55
Amakuba gaani, Nahano ye gagalola
1 Imwoꞌmwimangizi waꞌbimbi. Izaburi ya Dahudi. Iri mu lasibwa neꞌnanga.
2 E Rurema, ikyanya ndi mu kuhuuna, utambeereze ingoto,
si ukizi nyuvwiriza.
3 Ee! Unyuvwirize, unanjuvye.
Si ngoli gweti ngagerania, na ngoli shengusiri.
4 Abagoma baani, bagweti baganyamiriza,
iri bananvutulira amasu.
Bagweti bagakizi nyingiza mu makuba,
banali mu ndeera ku buraakari bwabo.
5 Narufu akoli gweti agandeera.
Kwokwo, umutima gwani gugweti gugapuupa.
6 Bwo ngoli yobohiri, ngweti ngajuguma,
na ngoli humiirwi.
7 Nanadeta kwokuno: «Nga nangabiiragi neꞌbyubi nga ngunde,
nangabalaziri, na ngende ho ngaluhuuka.
8 Ee ma! Nangayinywereresiri mwiꞌshamba,
na ngendi tuula yo.
9 Nangapumusiri ikihuhuuta neꞌmidunda.
Ninanungeere, mbike ho nangalonga umutuula.»
10 E Nahano, balya banangora-mabi, ubabuliisagye ubulyo, maashi,
halinde batakizi yuvwanwa mu ndeto zaabo.
Buno, mbwinagi ngiisi kwo bakola mu langama,
banali mu longoozania mu kaaya.
11 Ubushigi niꞌzuuba, bagweti bagazunguluka mu kaaya,
iri banalibuzania, noꞌkuvyulana mweꞌnzigo.
12 Si bali mu shereeza-shereeza hooshi mu kaaya.
Banagweti bagakizi biikirana ibikando,
iri banakizi beesha-beesha.
13 Uyo úgweti úganduka, nga angabiiri ali mugoma wani,
nangamúyigenderiiri.
Umushombani wani, nga angabiiri ye ndusiri,
njuba ngagendi múyibisha.
14 Haliko ulya mugoma, kiziga ali wehe, we tutuliinwi.
Si we mwira wani wa vyuka-ngwejere!
15 Twâli kizi ganuulira kuguma mu ngoome nyiija.
Twanâli kizi gendanwa ku kisegengo,
mu kugenda iwa nyumba ya Rurema.
16 Yabo bagoma baani, si amabi naaho, go gakoli yijwiri mu mitima yabo!
Aaho! Narufu abakange,
banagendi ziikwa mu shinda bakiri bagumaana.
17 Haliko niehe, ngakizi tabaaza Nahano Rurema,
halinde anangize.
18 Ndi mu shiiba ngweti ngalibuuka,
kushaagira shesheezi, halinde kalenge-renge, kiri naꞌkabigingwe.
Ikyanya ngweti ngamúlirira, mbu andabaale,
ali mu kizi yuvwa izu lyani.
19 Kundu abagoma baani bali kanyegete,
banabe bagweti bagandeera,
haliko Rurema agakizi nguluula,
na njaage mwiꞌzibo buzira kukomeresibwa.
20 Rurema atwaziri imyaka neꞌmyakuula.
Neꞌkyanya aganyuvwa, agabonia abagoma baani ishoni.
Mukuba, boohe, batamúsimbahiri,
batanaloziizi ukujanda amabi gaabo.
21 Ulya úshuba mwira wani, kundu tukanywana ikihango twe naye,
haliko anagendi kihongola, anayiji ndeera.
22 Kundu amagambo gaage gali ga kulembuusania,
si mu mutima gwage, muyijwiri naaho inzaliro zoꞌkukizi teerania.
Amagambo gaage, kundu gali mu nozania nga mavuta,
si gali mu yiji kerana nga ngooti.
23 Ewe! Ikyanya uli mu longaga amakuba,
ulekage Nahano abe ye gagalola.
Yenyene agakizi kuhahala.
Atagaaleka umundu mwija kwo atibukire haashi.
24 E Rurema, banangora-mabi bagweti bagatebana, iri banayitana.
Kundu kwokwo, ugaki balindimulira i nakwere.
Kundu ukabaheereza isiku nyingi, mbu balame,
si batagaahisa kiri neꞌkihande kyazo.
Haliko niehe ku luhande lwani, ngubiisiri kwoꞌmulangaaliro.