56
Ndaakikyo kyoba, bwo ndangaliiri Rurema
1 Imwoꞌmwimangizi waꞌbimbi. Izaburi ya Dahudi, ku kyanya Abafirisiti bakamúgwata mu kaaya keꞌGaati.*56.1 1 Samweri 21.11-13. Luli mu yimbwa ngoꞌlwimbo lwiꞌhumba íriri mu yisunga mu biti byeꞌmyalooni.
2 E Rurema, unyuvwirwe indengeerwa.
Si abandu balangi bagweti bagandambiriza.
Bali mu shiiba, bagweti bagandeera,
3 iri banangamba umulege-rege gwoshi.
Bali mu yiji ndeera ku bwikangaate, banali katundu.
4 Ikyanya ndi mu yoboha,
ndi mu biika Rurema kwoꞌmulangaaliro.
5 E Rurema, ngweti ngakuyivuga hiꞌgulu liꞌgambo lyawe,
na ngweti ngakubiika kwoꞌmulangaaliro.
Kwokwo, ndagateerwa neꞌkyoba.
Si balya bandu boꞌkugendi fwa, ndaakwo bangaki ngira!
6 Balya balangi, bali mu shiiba bagweti bagashobania amagambo gaani.
Banali mu kizi shungika amagambi mabi hiꞌgulu lyani.
7 Bali mu shiiba bandegiiri, gira balole ho ndi mu fina.
Bafitiirwi naaho kwo banyite.
8 E Rurema, utabaleke kwo bafuushuke.
Haliko, ubatindimaze ku buraakari bwawe.
9 Yulu lwimbo lwoꞌkukubululukira, ulukengeere, maashi!
Imigenge yani, ukizi gisingula mu kibuhu,
bwo ikoli yandisirwi mu kitaabo kyawe.
10 Ikyanya ngatabaaza Rurema,
abagoma baani bagayami galukira inyuma.
Kwokwo, lyo ngaamenya kwo Rurema ali uluhande lwani.
11 E Nahano Rurema, ngweti ngahuuza Igambo lyawe.
Ee! Ndi mu lihuuza bweneene.
12 Na bwo ngubiisiri kwoꞌmulangaaliro, ndagaki teerwa neꞌkyoba.
Umundu, kutagi kwo agashubi ngira?
13 E Rurema, ngiisi byo nꞌgakulagaania, ngola ngabigira.
Ee! Mu kudeta kongwa, ngakutangira ituulo.
14 Mukuba, wâli kizi ndanga, ndabambaajire,
wanakizi ngiza mu lufu.
Kwokwo, ngakizi genda ndi kuguma na Rurema.
Mu mulengeerwe gwage, mwo muli ubulamu.