60
Ubutabaazi bwaꞌbandu buli busha
1-2 Izaburi ya Dahudi, ku kyanya akalwa naꞌBaharaamu boꞌluhande lweꞌmbembe, naꞌbeꞌZoba, na ku kyanya Yohabu akagaluka anayita Abahedoomu bihumbi ikumi na bibiri, mu ndekeera yoꞌMuloba. Iri mu yimbwa ngoꞌlwimbo «Akaaso keꞌkihango.» Iri mu tangwa imwoꞌmwimangizi waꞌbimbi.
E Rurema, si ukoli turakariiri.
Keera ukatujanda, wanatushaabula.
Kundu kwokwo, we kongwa, ushubi tugalulira imwawe.
Keera ukashagania ikihugo, kyanaba neꞌmilali.
Aaho! Iyo milali, ugizibe. Si ikihugo kiki jugumbiri.
Abandu baawe, keera ukabayingiza mu makuba bweneene.
Idivaayi yo watuheereza, keera yatulalusa,
na buno tukola mu bambaajira.
Kundu kwokwo, ikyanya abandu bali mu ba bakusimbahiri,
uli mu biika irembera hiꞌgulu lyabo.
Yiryo irembera, ikyanya bali mu yingira mwiꞌzibo, liri mu bakania.
E Rurema, utukize ku bushobozi bwawe.
Ee! Bwo utukuuziri, utukizagye.
 
Rurema kwo atuuziri ahandu haage heeru, adetaga kwokuno:
«Ikyanya ngaaba keera nahima, ngagaba akaaya keꞌShekemu bihande-bihande.
Ngabunduula neꞌndekeera yeꞌSukooti mituli-mituli.
Ibihugo byeꞌGiryadi na byeꞌManaasi, biri byeꞌmwani.
Ikihugo kyeꞌHifurahimu kiri nga ngofeera yani yeꞌkyuma.
Abandu beꞌBuyuda bafumbiiti ingoni yani yeꞌkyami.
10 Haliko ikihugo kyeꞌMohabu kyohe, guli mutanga gwo ndi mu karabira mwo.
Neꞌkihugo kyeꞌHedoomu, kyo ndi mu laaviza kwaꞌmagulu.
Abandu beꞌBufirisiti, ngakizi bayamiriza kwo nabahima.»
 
11 Aaho! Nyandagi úgandongoora,
mbike mu kaaya kazitire keꞌHedoomu?
12 Ka utali wehe, e Rurema? Halikago buno, keera watujanda.
Si utakiri mu herekeza abasirikaani biitu mwiꞌzibo!
13 Ututabaalage, maashi! Tulonge ukuhima abagoma biitu.
Mukuba, ubutabaazi bwaꞌbandu buli busha.
14 Rurema, iri angaba ali uluhande lwitu, lyo tugaahima.
Ee! Ye gatuhimira abagoma biitu.