61
Ndoziizi kwo ngizi tuula mu nyumba yawe ndaluule
1 Izaburi ya Dahudi, imwoꞌmwimangizi waꞌbimbi. Iri mu yimbwa kwiꞌzu lyoꞌlulanga.
2 E Rurema, uyuvwirize ngiisi kwo ngweti ngakulirira.
Bwo ngweti ngakuhuuna, undege amatwiri.
3 Ukulyokera heꞌkihugo kihekiiri, ngweti ngakuhamagala.
Si umutima gwani gukoli shengusiri.
Kwokwo, undongoore halinde ku lwala úlushuumiri.
4 Ikyanya abagoma bâli kizi gira mbu bandeere,
we wâli kizi njuutira.
Ee ma! We Luzitiro lwani.
5 Ndoziizi kwo ngizi tuula mu nyumba yawe ndaluule,
ngizi langwa mu byubi byawe.
6 E Rurema, keera ukayuvwa ngiisi kwo nꞌgakulagaania.
Keera wanambeereza ubuhyane mu bakusimbahiri.
7 E Rurema, ubulamu bwa mwami, ubuyushuulage kweꞌsiku nyingi.
Imyaka yage ihike ku bibusi bingi.
8 Leka mwami akizi twala imbere lyawe,
halinde imyaka neꞌmyakuula.
Ukizi múlanga mu kuyemeerana,
na mu kukundana.
9 E Rurema, ngakizi yama ngweti ngayimbira iziina lyawe.
Na ngiisi byo nꞌgakulagaania, ngakizi bikwiza ngiisi lusiku.