63
Ikyanya ngiri noꞌmuuka, ngakizi kuyivuga
Izaburi ya Dahudi. Ikayandikwa ku kyanya âli riiri mwiꞌshamba lyeꞌBuyuda.
E Rurema, wehe we Rurema wani.
Nguloziizi bweneene.
Umutima gwani gunyotiirwi hiꞌgulu lyawe.
Kiri naꞌmagala gaani gakoli yumiri, ngiꞌdaho íryabula amiiji.
Keera nꞌgakubona mu nyumba yawe,
nanaloleekeza ubushobozi bwawe, noꞌbulangashane bwawe.
Urukundo lwawe, lwo luli naꞌkamaro ukuhima ubugumaana.
Kyo kitumiri ngakizi kuyivuga.
Ikyanya ngiri noꞌmuuka, ngakizi kuyivuga,
na ngizi golola amaboko hiꞌgulu, mu kuhuuna kwiꞌziina lyawe.
Ngoli siimiri bweneene, ukuhima umundu úwalya íbiheshiri.
Kwokwo, ngakizi kuyivuga, mu kukuyimbira.
 
Ikyanya ndi mu ba ngwejiiri, ndi mu kukengeera.
Ubushigi bwoshi, ndi mu kizi yitoneesa hiꞌgulu lyawe.
Bwo ugweti ugakizi ndabaala,
ndi mu kizi yimba mu kimbehwa kyeꞌbyubi byawe.
Na bwoꞌkuboko kwawe kuli mu kizi njuutira,
ngakizi beera hoofi lyawe.
 
10 Kundu abandu bangaba baloziizi ukunyita,
haliko bagashereezibwa naaho, banalindimulirwe i nakwere.
11 Bagayitwa ku ngooti.
Neꞌbirunda byabo, binaliibwe na banyambwe.
 
12 Haliko, mwami agashambaalira Rurema.
Ee! Ngiisi ábali mu biika Rurema kwoꞌmulangaaliro,
bagakizi múyivuga.
Si abanabibeesha, boohe, bagahulisibwa.