64
Ábakoli kwaniini, Nahano ali mu bashuutira
1 Izaburi ya Dahudi, imwoꞌmwimangizi waꞌbimbi. Ulwimbo.
2 E Rurema, abagoma baani bambikiiri ikikando.
Ku yukwo, uyuvwe ngiisi kwo ngweti ngayidodomba,
unakizi njuutira.
3 Yabo bagoma, balyagagi banangora-mabi, banali mu gira amagambi.
Ee ma! Si bagweti bagaagira akalugi bweneene!
Kundu kwokwo, nakuhuuna kwoꞌmbishe.
4 Indimi zaabo zigweti zigakizi kera nga ngooti nyugi.
Amagambo gaabo gali mu yitana nga myambi.
5 Kundu umundu angaba ali woꞌkuli, si bagweti bagamútegeera,
banakizi múlasha imyambi, buzira kuyoboha.
6 Ikyanya bagweti bagashungika amabi, bali mu kanania umutima.
Bagweti bagaganuula ngiisi kwo bagabisha imitego yabo,
mu kudeta kwokuno: «Aaho! Nyandagi úgaabona?»
7 Banali mu gira amagambi mabi kwokuno:
«Aaho! Byo twashungika, bitungiini. Ndaakwo kundi.»
Ku kasiisa, abandu bali benge-benge, ku nzaliro ízifundisirwi mu mitima yabo.
8 Kundu kwokwo, Rurema agayami balasha imyambi,
halinde banayibumbulike haashi.
9 Agakoleesa amagambo gaabo boonyene, mu kubashereeza.
Ngiisi ábagaabona kwokwo, bagakizi zuuza amatwe.
10 Abandu booshi, iri bagaabona kwokwo, bagagwatwa neꞌkyoba.
Banakizi yitoneesa ngiisi kwo Rurema ali kikalage mu kukola.
Yibyo byoshi, banakizi bimenyeesania.
11 Ábakoli kwaniini, Nahano agakizi bashuutira,
halinde banakizi shambaala mu kati kaage.
Kwokwo, ngiisi ábatungiini mu mutima, bakizi múyivuga.