65
Tukizi deta kongwa imwa Nahano
1 Izaburi ya Dahudi, imwoꞌmwimangizi waꞌbimbi.
2 E Rurema, ukwaniini ukizi yivugwa mu kaaya keꞌSayuni.
Ee! Ngiisi byo tukakulagaania, tugabigira.
3 Ikyanya tuli mu kuhuuna, uli mu tuyuvwa.
Kyo kitumiri abandu booshi bagakizi kuyijira.
4 Ikyanya tukoli zidohiirwi neꞌbyaha biitu,
uli mu tukoga byo.
5 Bahiriirwi ngiisi bo ukatoola,
kwo bayiji tuula mu nyumba yawe ndaluule.
Mwomwo, mwo tugakizi gashaanirwa.
6 E Rurema, we gweti ugatukiza.
Neꞌkyanya tuli mu kuhuuna,
uli mu tushuvya, mu kukizi tugira mweꞌbitangaaza.
Abandu ábatuuziri mu mahanga gooshi, bakulangaliiri,
kiri na ábatuuziri i kajabo keꞌnyaaja mbamu.
7 Uyiheeziizi ubushobozi buhamu bweneene.
Kiri neꞌmigazi, wanagibiika ahandu haayo.
8 Ikyanya imidunda iri mu birinduka bweneene mu nyaaja,
uli mu gihoohya.
Neꞌkyanya ibinyamahanga biri mu kizi gira akalugi,
uli mu kamala.
9 Yibyo bitangaaza byawe, biri mu soomeza kiri na ábatuuziri ku mbeka zeꞌkihugo.
Ee! Ukulyokera hiꞌzuuba liri mu huluka, halinde ho lisookera,
we mu tuma tuli mu banda akabuuli.
10 Ugweti ugakizi hahala ikihugo, iri unakiniekeza invula,
unakibiike mweꞌnagiira, halinde kinayere.
Inyiiji zaawe ziyamiri ziyijwiri,
halinde abandu bali mu kizi yimbula bweneene.
Kwokwo, kwo ukashungika.
11 Uli mu nywisa indalo,
gira zibombe, zinanovuhe,
halinde lyeꞌmbuto zilonga ukumera.
12 Ngiisi mwaka, uli mu yeza imimbu bweneene.
Ikyanya tuli mu gitwala i kaaya mu magaare giitu, gali mu ba gayijuliiri.
13 Kiri na mwiꞌshamba, ibyasi biri mu mera hooshi.
Utugangazi natwo, tuli mu yera, iri tunashambiiri.
14 Mu ndagiriro, muyijwiri ibibuzi katundu.
Na mu tubanda natwo, muyijwiri ingano.
Yibyo byoshi, bigweti bigakizi yimba ku bushambaale, awi yiyi yiyi!