66
Tukizi deta kongwa imwa Nahano
1 Imwoꞌmwimangizi waꞌbimbi. Ulwimbo.
Mwe mutuuziri mu kihugo,
mukizi bandira Rurema akabuuli ku bushagaluke.
2 Mukizi huuza ubulangashane bwage,
munakizi bwira abandu hiꞌgulu lyabwo.
3 Mukizi bwira Rurema kwokuno:
«Ngiisi byo uli mu gira, biri bya kitangaaza.
Bwo uli kihagarusi bweneene,
abagoma baawe bali mu yiji fukama imbere lyawe.
4 Abandu booshi ba mu kihugo, bali mu kuyikumba,
iri banakizi kuyimbira inyimbo zoꞌbwivuge, mu kusimbaha iziina lyawe.»
5 Muyiji bona ngiisi byo Rurema akagirira abandu baage.
Byoshi, biri bya kahebuuza.
6 Ikyanya akayumya inyaaja,
hanaboneka injira yaꞌbandu baage bakajabuka mwo.
Kwokwo, tuyiji múshambaalira.
7 Rurema atwaziri ku bushobozi bwage, halinde imyaka neꞌmyakuula.
Ayamiri ali mu lola abandu baꞌmahanga gooshi,
gira batayiji kengeera bahuna imbere lyage.
8 E bandu mweshi! Mukizi huuza Rurema witu,
halinde ubwivuge bwage bukizi yuvwikana.
9 Agweti agatulanga,
halinde amagulu giitu gatatyerere.
10 E Rurema, wâli kizi tugeza bweneene,
nga kwo bali mu leeza iharija mu muliro.
11 Ukatugwasa mu lushenga,
wanatuheesa imiteekerwa mizito.
12 Wanahanguula abagoma biitu, kwo bakizi tulibata kwo.
Twâli kizi leezibwa mu miiji, kiri na mu muliro.
Kundu kwokwo, ukatuhisa ho tukoli vwagariiri.
13-14 Ikyanya nâli kola mu makuba,
nꞌgakulagaania kwo ngakutangira amatuulo.
Kwokwo, ngayegeera inyumba yawe, njoliiri ibitugwa byoꞌkusiriiza.
Ngiisi kwo nꞌgakulagaania, kwo nganagira.
15 Ee! Ngweti ngakutangira ibibuzi íbidehiri,
kuguma neꞌshuuli, neꞌmbene.
16 Mwe musimbahiri Rurema, muyiji yuvwa.
Leka nimùbwire ngiisi byo akangirira.
17 Nꞌgamútabaaza kwiꞌzu lihamu,
iri ninamúyivuga.
18 Íngibe nzingwiri ikyaha mu mutima gwani,
Nahano atâli agakizi nyuvwa.
19 Haliko, ikyanya nâli kizi mútabaaza,
ku kasiisa, âli kizi ndega amatwiri.
20 Rurema abe ye gakizi yivugwa.
Mukuba, ikyanya nꞌgamútabaaza, ananyuvwa,
atanaluha ukukizi nyereka urukundo lwage.