69
Kutakira Nahano
1 Imwoꞌmwimangizi waꞌbimbi. Izaburi ya Dahudi. Iri mu yimbwa neꞌnanga.
2-3 E Rurema, ungizagye, we kongwa!
Si keera nayikiraga mu musaayo,
ndaanabyo nangaki yimangira kwo.
Ngoli tibukiiri mwiꞌbenga lyaꞌmiiji,
ganakoli mbikiiri mwiꞌgosi.
Imidunda ikola mu mbunguukana.
4 Keera nayamiza bweneene, nanaluha.
Kiri noꞌmumiro gwani, gukoli hangalaliiri.
E Rurema, maashi, amasu gaani, gakoli fwifwitiiri,
mu kulindira kwo ugayiji ndabaala.
5 Abagoma baani bagweti baganjombera ubusha,* 69.5 Zaburi 35.19; Yohana 15.25.
banali kandaharuurwa ukuhima umushaku úguli kwiꞌtwe lyani.
Bagweti bagananyishuza ibindu, ndaanabyo nazimba.
Na kundu ndaabyo nabahubira,
haliko baloziizi naaho ukunyita.
6 E Rurema, uyiji bwija ngiisi kwo nꞌgakuhubira.
Bitanganaziga kwo ngubishe amahube gaani.
7 E Nahano Rurema waꞌBahisiraheeri!
Si we mwene ubushobozi bwoshi!
Aaho! Ngiisi ábakulangaliiri, utabateeze ishoni hiꞌgulu lyani.
Ngiisi ábagweti bagakulooza, batateteerwe.
8 Si ngola mu gayirizibwa hiꞌgulu lyawe.
Kiri naꞌmalanga gaani, gabonesiri kweꞌshoni.
9 Mu beene witu, ngolaga nga mundamenywa.
Kiri mu bakulu baani, na mu baali baani,
mbatuuziri mwo nga kinyamahanga.
10 Umwete gwo mbiiti hiꞌgulu lyeꞌnyumba yawe,
gugahambiri nzingoola.
Kiri neꞌkyanya uli mu tukwa,
na naani, na mbe ndusirwi.† 69.10 Yohana 2.17; Barumi 15.3.
11 Ikyanya ndi mu yishalisa, na nyambale ubusuuzu mu kati kaꞌmalira,
bali mu kizi nyamiriza.
12 Ee! Ikyanya ndi mu jengeerwa,
bali mu mbonyoleza.
13 Abandu bali mu genda bagangamba mu njira.
Kiri naꞌbalalwe bagweti baganjekeereza mu nyimbo zaabo.
14 E Nahano, kundu kwokwo, ngweti ngakuhuuna kwo ukizi ngashaanira.
Aaho! Unjuvye mu kati koꞌrukundo, kwo luli lwingi.
Ungizagye, we kongwa, halinde na ngire lwoshi-lwoshi.
15 Unjaaze mu musaayo, ndayiji kengeera naguyikira mwo.
Kundu abandu bali mu ba banjombiri, ungizagye mu maboko gaabo,
unjaaze na mu gano mabenga gaꞌmiiji.
16 Utaleke ngumbululwe noꞌmwijulire gwaꞌmiiji, mbu gumbungukane.
Utanaleke kwaꞌmabenga ganyulubize.
Ee! Utaleke mbu nimirwe na Narufu.
17 E Nahano, unjuvyagye! Si urukundo lwawe, luli lwaꞌkahebuuza,
noꞌlukogo lwawe, luli luhamu bweneene!
Aahago! Ungebagane ho ndi.
18 Bwo ndi mukozi wawe, utambindulire ingoto.
Si ngweti ngalibuuka bweneene! Aahago! Unjuvyagye duba.
19 Unyegeere, gira ungize.
Unguluule mu maboko gaꞌbagoma baani booshi.
20 Abagoma baani, wenyene uyiji ngiisi kwo bali mu ndeta,
na ngiisi kwo ndi mu teezibwa ishoni.
Bagweti baganyamiriza, iri banandyoza,
21 noꞌkukizi nduka.
Keera navunika umutima, na ngoli shengusiri.
Ngweti ngalooza umundu woꞌkumboleeza,
si ndaaye úli ho, kiri noꞌmuguma!
22 Yabo bagoma, keera bakambiikira kolobwe mu byokulya.
Neꞌkyanya nꞌganyoterwa, banamba amaavu goꞌlukalishi.
23 Aahago! Ibyokulya byeꞌsiku zaabo ngulu,
bikizi ba yo mitego yoꞌkubagwasa.‡ 69.23-25 Barumi 11.10.
24 Amasu gaabo, gayidike mweꞌkihulu, halinde bataki shubi bona.
Neꞌmigongo yabo, ikizi yama igondamiri.
25 Ukizi barakarira, mu kubayonera kwoꞌbute bwawe.
Ee! Uburaakari bwawe kwo buli bulangi, bubasivye,
26 halinde ishumbi zaabo, zisigale mushaka.§ 69.26 Mikolezi 1.20.
Hatanabe umundu woꞌkushubi tuula mu maheema gaabo.
27 Yabo bagoma, ikyanya ukola mu hana abandu,
nabo kandi, bali mu shubi yiji balibuza.
Abandu babi, ikyanya uli mu bakomeeresa,
nabo bali mu bayushuulira ubulyaniirwe, mu kubashekeereza.
28 Ibyaha byabo, ukizi bilegeereza, halinde bahanwe bweneene,
utanakolwe kwo wabakoga.
29 Ubahotolage mu kitaabo kyoꞌbulamu,
utanababiike mu muharuuro gwa ábakwaniini.
30 E Rurema, ngola mu malibu, na ngoli shengusiri.
Aaho! Ungizagye ku bushobozi bwawe.
31 E Rurema, ngakizi kuyimbira, mu kuyivuga iziina lyawe.
Na ngizi kuhuuza, mu kukutangira kongwa.
32 Kwokwo, kwo ngakusimiisa,
ukuhima ho nangakutangiiri ituulo lyeꞌngaavu,
kandi iri lyeꞌshuuli íkoli twiri.
33 Abakeni, ikyanya bagaabona kwokwo, bagasiima.
Kwokwo, mwe muli mu looza Rurema, mukizi shambaala.
34 Mukuba, ikyanya abandu bali mu ba bagoozirwi, banatabaaze Nahano,
ali mu ba abayuvwiti.
Neꞌkyanya bali mu ba bagwasirwi mu mbohe,
atali mu bahebuura.
35 Igulu neꞌkihugo bikizi yivuga Rurema,
kuguma neꞌnyaaja, na íbiziri mwo byoshi.
36 Mukuba, Rurema agayiji kiza akaaya keꞌSayuni.
Kiri noꞌtundi twaya twa mu Buyuda, agatuyubakulula.
Haaho, lyaꞌbandu baage bagayiji tuhyana, banashubi tutuula mwo.
37 Ee ma! Ngiisi ábali mu múkolera, kiri naꞌbaana baabo, bagabihyana.
Ngiisi ábakuuziri iziina lyage, bo bagatuula mwo.