72
Ukuhuunira mwami
1 Izaburi ya Sulumaani.
E Rurema, ushoboleese mwami, akizi kulikira ukuli kwawe.
Yukwo kuli, ukizi kuyereka kiri noꞌmuluzi.
2 Ee! Umútabaale akizi twa imaaja zaꞌbandu baawe mu kati koꞌkuli,
kiri neꞌmaaja zaꞌbakeni.
3 Ku migazi kukizi yera ibyokulya bingi.
Bikizi yera kiri na ku tugangazi.
4 E Rurema, utabaale mwami halinde akizi bulanira abakeni.
Kiri naꞌbaana baabo, akizi bakiza.
Haliko, ngiisi ábagayiji balibuza, boohe, anabafutagule.
5 Mwami akizi longa ulushaagwa ngiisi kyanya,
abaagage ngiꞌzuuba kwo liyamiri liri mu langashana,
na nga kwoꞌmwezi gugenderiiri ukukizi moleka.
6 Uyo mwami abaagage nga nvula, kwo igweti igaania mu ndangiriro,
halinde ikihugo kikizi longa amiiji.
7 Umundu woꞌkuli alonge ukukizi genduukirwa isiku zaage zooshi,
halinde akizi longa ukuyunguka mu kati koꞌmutuula.
Kukizi ba kwokwo, halinde ku kyanya umwezi gugaaba gukiri ho.
8 Mwami alonge ukukizi twala, halinde ku nyaaja zooshi,
ukulyokera ku lwiji Hefuraati,
halinde ukuhisa ku mbeka yeꞌkihugo.
9 Abandu ábatuuziri mwiꞌshamba bakizi múfukamira.
Kiri naꞌbagoma baage, bakizi lamba ulukungu imbere lyage.
10 Abaami beꞌTarasisi naꞌba mu tulira, bagakizi múramburira.
Abaami beꞌSheeba naꞌbeꞌSeeba, bakizi múleetera amatuulo.
11 Ee! Abaami booshi bakizi fukama imbere lyage.
Aba mu mahanga gooshi bagakizi múkolera.
12 Ikyanya umukeni agamútabaaza, agamúkiza.
Ee! Agamútabaala, bwo atahiiti ugundi mutabaazi.
13 Ikyanya abakeni bagaaba bakola mu bukaholwe,
agabayuvwirwa indengeerwa, anabaguluule mu lufu.
14 Neꞌkyanya bagalibuzibwa ku kahaati, agabakiza.
Mukuba, uburambe bwabo, buli neꞌkishingo kihamu imwage.
15 Mwami akizi lama!
Akizi haabwa amatuulo geꞌnooro kulyoka i Sheeba.
Abandu bakizi yama bali mu múhuunira imwa Rurema,
banakizi shiiba bagweti bagamúgashaanira.
16 Utugangazi tuyijule kweꞌmimbu,
halinde ikihugo kilongage ukuyera bweneene.
Ibiti bikizi tongeka kweꞌbitumbwe, ngeꞌbiti byeꞌLebanooni.
Abandu bakizi genduukirwa nga byasi mu ndagiriro.
17 Mwami akizi yama alumbuusiri isiku zooshi.
Anakizi kengeerwa, halinde ku kyanya izuuba ligaaba likiri ho.
Aba mu mahanga gooshi, bakizi gashaanirwa hiꞌgulu lyage,
halinde nabo banakizi múgashaanira.
18 Nahano Rurema waꞌBahisiraheeri, akizi yivugwa.
Mukuba, ibitangaaza mwene yibyo, yehe naaho, ye gweti úgakizi bigira.
19 Tukizi huuza iziina lyage, kwo liri noꞌbulangashane,
halinde imyaka neꞌmyakuula.
Ikihugo kikizi yijula mwoꞌbulangashane bwage.
Bikizi yama kwokwo! Ee! Bikizi yama kwokwo!
20 Kwoku, kwaꞌmahuuno ga Dahudi mugala Yese gayutaga.