Umuteeko gwa kashatu
73
(Zaburi 73–89)
Kundu banangora-mabi bagaziri, si Rurema ali mwija
1 Izaburi ya Hasafu.
Ku kasiisa Rurema agweti agagashaanira Abahisiraheeri,
ngiisi ábakoli yeruusiri mu mitima yabo.
2 Si niehe nâli kola bu siitara.
Hininiini naaho, nga nꞌgateereka.
3 Ikyanya nꞌgabona ngiisi kwo banangora-mabi bali mu yikangaata,
na ngiisi kwo bakoli gendukiirwi, nanayami gwatwa noꞌluugi.
4 Yabo banangora-mabi, ndaabyo íbiri mu bagoora.
Amagala gaabo gafiisiri, ganadediiri.
5 Batali mu libuuka ngaꞌbandi,
batanali mu kizi goorwa.
6 Ikyanya bali mu yikangaata, buli mu ba nga migufu miija yeꞌnooro mu magosi gaabo.
Neꞌkyanya bali mu komeresania, kuli mu ba nga byambalwa byabo.
7 Bweꞌmitima yabo iri mindagabika, bali mu kizi yifunda mu mabi.
Si ubuligo bwo bali mu yitoneesa kwo, buleeziri ulugero bweneene!
8 Bali mu shekerezania, iri banagambana,
banali mu biikirana ikikando mu kati koꞌbwikangaate.
9 Bali mu kizi shaahuza igulu,
iri banakizi yihaya, kwo bo beene kihugo.
10 Yibyo byoshi, byo bitumiri abandu bali mu bakulikira.
Ee! Bali mu mira amagambo gaabo nga miiji,
11 banakizi naaka kwokuno: Aaho! Kutagi kwo Rurema angamenya?
Kundu abandu badesiri kwo ali hiꞌgulu lya byoshi, si ndaabyo ayiji!
12 Balya banangora-mabi batali niꞌgoorwa lyoshi-lyoshi.
Si ubugale bwabo, buli mu kizi yushuuka ngana.
13 Niehe, ikyanya ndi mu kizi yihangaana,
na mbonage naaho kwo ndaabyo nagira.
Kiri neꞌkyanya ndi mu kizi yilanga, mbu ndagire ubuligo,
ndaako kamaro kooshi nalonga.
14 Si ndi mu shiiba mu malibu naaho!
Ngiisi shesheezi ndi mu hanwa-hanwa.
15 Íngidete, ti: Leka naani ndetage amagambo mabi.
Haaho nangabiiri nayihindulira abandu baawe.
16 Ikyanya nꞌgalooza ukumenya íbitumiri abanabyaha bali mu kizi genduukirwa,
nanabona kwo bikoli ngayiri bweneene.
17 Haliko, ikyanya nꞌgayingiraga mu nyumba ya Rurema,
lyoki lyo nꞌgasobanukirwa ngiisi kwaꞌbanabyaha bâye gooke.
18 Ee ma! Balya banabyaha, ukababiika ho bangasiga amatwe gaabo.
Si bali mu bambaajira, halinde banayitimbe haashi, banashereere!
19 Ee! Masaasa atabukwa, bagweti bagakizi yami shereera.
Bali mu kangwa ku magambo maniini naaho, banayami minikwa.
20 E Nahano! Ikyanya ugavyukaga, ugabashekeereza ngana.
Baganyerera ngana, nga birooto íbiri mu yibagirwa shesheezi.
21 Ikyanya nâli jengiirwi mu mutima gwani, nanaba ngoli rakiiri,
22 kyanatuma ngaaba muhwija, na muzira bwenge.
Imbere lyawe, nâli kolaga nga nyamiishwa nzira bwenge.
23 E Rurema! Kundu kwokwo, nyamiri tutuliinwi.
Uli mu ngwatira ku kuboko kweꞌlulyo,
24 unali mu ndongoora, mu kukizi mbanuula
halinde mu kuheza, unanyegereze mu bulangashane.
25 Aaho! Nyandagi ye mbiiti yaho mwiꞌgulu, átali wenyene?
Kiri na mu kihugo, ndaaye gundi ye ndi mu yifwija.
26 Amagala gaani, noꞌmutima gwani, kundu biri mu yoloha,
haliko, Rurema ye mu ngania.
Ye misi yani, anali weꞌmwani, halinde imyaka neꞌmyakuula.
27 E Rurema, ngiisi ábali mu kuyilyosa kwo, bagaki shereera.
Ee! Booshi ábakujandiriiri, ugaki baminika ngana.
28 Ha lwani niehe, buli bwija ngizi beera hoofi na Nahano Rurema.
Mukuba, ye mwene ubushobozi bwoshi.
Ku yukwo, ndi mu tibitira imwage.
E Rurema, amiija go uli mu kizi kola, ngakizi gamenyeesa mu bandi.