74
Ubuhanya, ndaaye úyiji ngiisi kwo bugaaheka
1 Izaburi ya Hasafu.
E Rurema, kituma kiki ugweti ugaturakarira?
Ka watujandaga lwoshi-lwoshi?
E maashi! Si tukiri bibuzi byawe!
2 Aaho! Ukengeerage ngiisi kwo ukaguluula abandu baawe yaho keera.
Si ukatukiza, bwo tuli mulala gwawe, tunali buhyane bwawe!
Ukengeere naꞌkaaya kaawe Sayuni,
halya wâli tuuziri mu kihugo.
3 Uzamuukire yo bwo keera kakashaka,
ubonage ngiisi kwaꞌbagoma bakashereeza kiri neꞌnyumba yawe lwoshi-lwoshi.
4 Mu yeyo nyumba yawe, mwaꞌbagoma bakayidehereza mu tubuuli mbu bahima.
Munali mwo bakashinga irembera lyoꞌbuhimi bwabo.
5 Iyo nyumba, ikyanya bakagiyifunda mwo,
bâli gweti bagatema-tema ngana, nga kwo bali mu tema ulubako.
6 Kundu ibibambaazi byayo byâli nonosiri bweneene,
haliko bakabihomoola, mu kukoleesa isheenyo neꞌmingwaro.
7 Ha nyuma, banagisingoola, halinde yanajigimba yoshi.
Bakagiyulubaza, munali mwiꞌziina lyawe lyâli kizi yivugwa.
8 Banayigamba, ti: «E balya! Mugirage tubashereeze lwoshi-lwoshi.»
Kwokwo, ngiisi ho Rurema âli kizi yikumbirwa mu kihugo,
banagendi hasiriiza.
9 Tutaki bwini ibyereso, kwo Rurema agaki tukiza,
ndanakiye muleevi úkiri ho.
Yubwo buhanya, ndaaye úyiji ngiisi kwo bugaaheka.
10 E Rurema, ugaleka abagoma bagenderere ukukushekeereza halinde mangoki?
Aahago! Ka bagagenderera ukutuka iziina lyawe halinde imyaka neꞌmyakuula?
11 Kituma kiki wafunya ukuboko kwawe kwoꞌbushobozi?
Ukulambuule maashi, unabafute-fute, halinde baminikwe.
12 E Rurema, wehe we yamiri uli mwami witu ukulyokera kare.
Unali we mu kiza abandu baꞌmahanga gooshi.
13 We kabunduula inyaaja ku bushobozi bwawe.
Neꞌkyanya ukabona kirya kihuume kyoꞌmujoka mu nyaaja,
wanakifuta-futa.
14 We kafuta-futa kiri naꞌmatwe geꞌkingisho-ngisho Levyataani.
Umutumba gwakyo, wanagutobera inyamiishwa mwiꞌshamba.
15 E Rurema, we kanatuma ibirigo noꞌtudota bigakizi zununuka mwaꞌmiiji.
Haliko, inyiiji ízâli kizi hinga, zoohe, wanazikamya.
16 Izuuba noꞌmwezi, biri byeꞌmwawe.
Ee ma! We kabumba umulege-rege, kiri noꞌbushigi.
17 We kabiika imbibi zooshi zeꞌkihugo.
We kanatengeka kwo hakizi ba imbondo, hakizi ba neꞌkikamo.
18 E Nahano, ukengeere ngiisi kwaꞌbagoma bâli kizi kugayiriza.
Kundu bali bahwija naaho, si bâli kizi kushekeereza!
19 Twehe tuli nga ngunde zaawe.
Aaho! Ukengeerage ngiisi kwaꞌbandu baawe bakola mu libuzibwa.
Utatami tulasha mu tunwa tweꞌnyamiishwa.
20 E maashi! Ukengeerage neꞌkihango kyo tukanywana na naawe.
Kino kihugo, si kikoli yidisiri mweꞌkihulu!
Abandu banali mu komeresania ngiisi handu.
21 Abandu baawe bakola mu libuzibwa,
batanashobwiri, si bali bakeni.
Aaho! Utabalekeerere, mbu bateezibwe ishoni.
Haliko, uleke bakizi huuza iziina lyawe.
22 E Rurema, yimukaga maashi, gira uyibulanire!
Ukengeere ngiisi kwaꞌbahwija bali mu shiiba bagweti bagakuhonyoleza.
23 Ukengeere na ngiisi kwaꞌbagoma baawe bakola mu kunaakira.
Si yukwo kuyihaya kwabo, kugenderiiri halinde zeene!