75
Rurema naaho ye mutwi weꞌmaaja
1 Imwoꞌmwimangizi waꞌbimbi. Izaburi ya Hasafu. Ulwimbo. Luli mu yimbwa ngoꞌlwimbo «Utakizi shereeza.»
2 E Rurema, tugweti tugakutangira kongwa,
tunali mu menyeesania hiꞌgulu lyeꞌbitangaaza byawe.
Mukuba, uli mu kizi tubeera hoofi-hoofi.
3 Rurema adetaga kwokuno: «Ngola ngaatwa imaaja.
Nganazitwa ku kyanya íkikwaniini, na ku njira yoꞌkuli.
4 Ikihugo na íbiri mwo byoshi, kundu bigalenga mwoꞌmusisi,
haliko niehe ndi mu sikamya indaliro zaakyo.
5 Keera nꞌgabwira abanabwihemye kwokuno: “Muleke ukuyikangaata.”
Nanabwira na banangora-mabi: “Mutakizi yiheemya.
6 E maashi! Mutakizi gira mbu muyidundulike imbere lyani,
mutanakizi ba mindagabika.”»
7 Ndaaye mundu úwangatwa ulubaaja lwoꞌwabo,
aba alyoka uluhande lweꞌmuga, kandi iri lweꞌsheere, kandi iri wa mu mbande ziꞌshamba.
8 Si Rurema naaho, ye yamiri ali mutwi weꞌmaaja.
Ee ma! Ye mu kuza muguma, anatindimaze ugundi.
9 Nahano afumbiiti urukuzo úluyijwiri mwoꞌburaakari bwage,
anali mu bunywesa banangora-mabi booshi.
Bagweti bagabugotomera, batanasige kiri neꞌndooni.
10 Haliko niehe, ngakizi yimba inyimbo zoꞌkuyivuga Rurema wa Yakobo,
na ngizi múshambaalira imyaka neꞌmyakuula.
11 Rurema adetaga kwokuno: «Imisi ya banangora-mabi booshi, ngagivuna.
Haliko, ngiisi ábali mu ngulikira, boohe, ngabasikamya.»