77
Ikyanya nâli mu makuba, nꞌgatakira Nahano
1 Imwoꞌmwimangizi waꞌbimbi. Izaburi ya Hasafu. Luli mu yimbwa ngeꞌnyimbo za Yedutuni.
2-3 Ikyanya nâli riiri mu makuba, nâli kizi tabaaza Nahano Rurema.
Kwokwo, nanamúlirira kwiꞌzu lihamu.
Nanamala ubushigi bwoshi, nimúlambuliiri amaboko gaani.
Kundu kwokwo, umutima gwani gwanalahira, mbu gutaholeezibwe.
4 E Rurema, ikyanya ndi mu salira hiꞌgulu lyawe,
umutima gwani guli mu shenguka, na ngizi gongeera.
5 E Rurema, si utambangwiri kwo ndoole iro!
Na bwo njengusiri bweneene, ndaabyo ngi shobwiri ukudeta.
6 Ngweti ngayisaliza ku byâli kizi lenga yaho kare.
7 Ndi mu laala ngengiiri kwo nâli kizi yimba.
Ngweti ngayisaliza, iri na nyibuuza kwokuno:
8 «Aaho! Ka Nahano akayami tujanda lwoshi-lwoshi?
Ka atâye ki shubi tugashaanira?
9 Ka ataki tukuuziri?
Kiri neꞌmihango yage, ka keera agiyibagira lwoshi?
10 Ka Rurema ayibagira kwo ali wa lukogo?
Kwoku arakiiri, ka keera atuyima indengeerwa?»
11 Ha nyuma, nanadeta: «Ndaakwo kundi kwo ngaagira.
Kundu Rurema ali hiꞌgulu lya byoshi, haliko keera atuhindulira ingoto.»
12 E Nahano, ngi kengiiri ngiisi kwo wâli kizi tugirira.
Ee! Ngi kengiiri ibitangaaza byo wâli kizi gira yaho kare.
13 Ngiri mu kizi biyitoneesa kwo,
ndanganabishaaza mu mitono yani.
14 E Rurema, injira zaawe zooshi, ziri nyeeru.
Aaho! Nyandagi gundi úhiiti ubushobozi, nga Rurema witu?
15 E Rurema, we mu kizi gira ibisoomeza.
We nali mu kizi yereka ibinyamahanga ubushobozi bwawe.
16 Ku bwobwo bushobozi bwawe, wâli kizi kiza abandu baawe,
beene Yakobo, na beene Yusefu.
17 E Rurema, ikyanya Inyaaja Ndukula ikakubona,
yanakanguka, yanayoboha bweneene.
Amiiji gaayo ganateerwa neꞌkyoba ngana-ngana.
18 Mu bibungu, mwanavuduka invula, mwanakungula neꞌmikungulo.
Ngiisi luhande, imilavyo.
19 Inguba zanakizi lavya mu kihuhuuta.
Kiri neꞌbiryamu byanakizi lyamuza mu kihugo.
Ikihugo kyanashagana, kyanajugumbana.
20 Haaho, wanabera injira mu nyaaja,
halinde wanalenga mu tulingi twaꞌmiiji.
Ndaaye mundu úkabona ho ukafina.
21 Wâli kizi koleesa Musa na Harooni,
mu kurongoora abandu baawe nga bibuzi.