78
Ibyo Nahano akagira bitangayibagirwa
1 Izaburi ya Hasafu.
E bandu baani, muyuvwe ngiisi kwo ngamùyigiriza.
Yaga magambo gaani, mugatege amatwiri.
2 Aaho! Ngatondeera noꞌkumùbwira ku migani.
Ee! Ngaadeta ágâli bishamiri ukulyokera keera.*78.2 Mataayo 13.35.
3 Ngiisi byo tukayuvwa ku badaata, tukoli biyiji bwija,
byo tunagweti tugakizi deta.
4 Kiri naꞌbaana biitu, tutagababisha byo.
Ee! Ngiisi baana ábagaki yija,
tugabamenyeesa ibitangaaza byo Nahano âli kizi gira ku bulangashane bwage.
Âli kizi bigira ku bushobozi bwage, gira akizi yivugwa.
5 Rurema akaheereza Abahisiraheeriimaaja,
anabwira bashokuluza biitu kwo bakizi ziyigiriza abaana baabo.
6 Kiri naꞌbaana ábagaki butwa bazimenyeesibwe,
halinde abandu beꞌbibusi byoshi bakizi zimenya.
7 Kwokwo yizo maaja zaage, bakizi zikania,
iri banakizi biika Rurema kwoꞌmulangaaliro.
Ngiisi byo Rurema âli kizi gira, batayiji biyibagira.
8 Batanabe balangi, nga bashokuluza baabo.
Mukuba, boohe bâli kizi huna.
Imitima yabo itâli tungiini imbere lya Rurema,
batanâli kizi ba bemeera imbere lyage.
9 Beene Hifurahimu, ikyanya bâli mwiꞌzibo,
bâli fumbiiti imiheto neꞌmyambi.
Kundu kwokwo, banagalulwa kifudeete, halinde banapuumuka.
10 Mukuba, batâli kizi kania ikihango kya Rurema,
bakanalahira mbu batagakulikira imaaja zaage.
11 Kundu âli kizi bagirira ibitangaaza,
haliko banabiyibagira.
12 Mu kihugo kyeꞌMiisiri, kiri na mwiꞌshamba lyeꞌSowani,
Rurema âli kizi gira ibitangaaza mu masu ga bashokuluza baabo.
13 Anabera injira mu nyaaja, anabarongoora, halinde banagilenga mwo.
Amiiji gakabunduuka mwo kubiri, hanasigala nga bikombo.
14 Ku kyanya kya mwiꞌzuuba, âli kizi barongoora neꞌkibungu.
Na mu bushigi, âli kizi barongoora neꞌnguliro yoꞌmuliro.
15 Iyo munda mwiꞌshamba, anabera yeꞌnyaala,
zanakizi shyoka mwaꞌmiiji mingi bweneene, banakizi ganywa.
16 Ee! Akashyosa amiiji mu nyaala,
ganakizi hinga nga nyiiji.
17 Kundu kwokwo, banagenderera ukukizi yifunda mu byaha.
Ikyanya bâli riiri yaho mwiꞌshamba,
banakizi huna imbere lya Rurema úli hiꞌgulu lya byoshi.
18 Banagira mbu bakizi múgeza,
mu kukizi huuna kwo bahaabwe ngiisi byokulya byo bayifwijiri.
19 Banakizi tyoza Rurema kwokuno:
«Hano mwiꞌshamba, ka Rurema angatuheereza byo tugaalya?
20 Ikyanya akashulika ku lwala, amiiji ganaluhuluka mwo nga lwiji.
Kundu kwokwo, atangahasha ukutuheereza imikate, neꞌnyama.»
21 Nahano, iri akayuvwa kwokwo, anaraakara ngana-ngana.
Ubute bwage bwanayaka mu mbaga ya Yakobo nga muliro,
bwanayushuuka bweneene ku Bahisiraheeri.
22 Mukuba, batâli múyemiiri,
batanâli langaliiri kwo angabakiziizi.
23 Kundu kwokwo, akabayigulira imiryango yiꞌgulu,
anakyula kweꞌbibungu biyeguuke.
24 Kwokwo, kwo akabaheereza imana ukulyoka mwiꞌgulu,†78.24 Kulyoka 16.4; Yohana 6.31.
anakizi batibulira yo, gira bakizi lya.
25 Kwokwo, kwaꞌbandu bâli kizi lya ku byokulya byaꞌbaganda.
Yibyo byokulya, byâli tiita, nga kwo bâli loziizi.
26 Rurema anakyula ku bushobozi bwage, kweꞌmbuusi ilyoke uluhande lweꞌsheere,
na kweꞌgindi ilyoke ulweꞌkisaka.
27 Kwokwo, kwo akabatumira inyama zoꞌtunyuni,
zanaba nyingi bweneene nga lukungu.
Ee! Utunyuni twâli riiri katundu, nga mushenyu kwiꞌbuga.
28 Yutwo tunyuni, anakizi batibulira two naaho, ngiisi ho bâli shumbisiri,
hoofi-hoofi naꞌmaheema gaabo.
29 Emwe! Rurema akaheereza abandu nga ngiisi kwo bâli loziizi,
halinde banakizi lya, banahaage.
30 Kundu kwokwo, ikyanya Abahisiraheeri bâli kizi ba batazi gambwa,
neꞌbyokulya binabe bikiri mu tunwa twabo,
31 Rurema anayami barakarira,
anabayite mweꞌbihagarusi byeꞌmisore.
32 Kundu akagira kwokwo, batanamúyemeera,
banagenderera naaho noꞌkukizi yidulumbika mu byaha.
33 Kyanatuma bagaahisa imyaka mingi, bagweti bagahanyagala.
Na mu kuheza, banafwa booshi.
34 Ngiisi kyanya Rurema âli kizi bayita kwo, banakizi mútabaaza.
Banakizi yilega, iri banamúgalukira.
35 Ee! Bâli ki kengiiri kwo Rurema ali hiꞌgulu lya byoshi,
na kwo ye Lwala lwabo, ye wanâli kizi bakiza.
36 Si bâli kizi gira mbu bamúlyeryege.
Ee! Bâli kizi beesha imbere lyage.
37 Imitima yabo itâli tungiini imbere lyage,
batanâli kizi twaza ikihango kyage.
38 Kundu Rurema âli barakariiri,
si akakizi yihangirira ku bute bwage, atanaki baminika.
Ee! Âli bakejeriiri, anakizi bakoga ibyaha.
39 Mukuba, âli kengiiri kwo bali ba kufwa naaho,
banali nga mbuusi íri mu tee huusa, inayami nyerera.
40 Yaho mwiꞌshamba, bâli kizi huna imbere lya Rurema,
halinde anavunike umutima.
41 Kundu ye Mutaluule waꞌBahisiraheeri,
banakizi múgeza ngiisi kyanya, halinde anayagalwa.
42 Batanakengeera ngiisi kwo akakoleesa ubushobozi bwage,
mu kubakiza mu bagoma baabo.
43 Bâli yibagiiri kwo Rurema âli kizi gira ibitangaaza,
mu kihugo kyeꞌMiisiri, na mwiꞌshamba lyeꞌSowani.
44 Ee ma! Akahindula inyiiji zooshi, zibe muko,
kyanatuma mu Bamiisiri ndaaye úkazinywa kwo.
45 Anabalugiza isaazi nyingi bweneene, zanakizi balya.
Anabatuma na bakere, gira bakizi bashereegeza.
46 Anabatumira naꞌmahaazi,
ganakizi yonoona indalo zaabo, halinde imbuto zooshi zanahera.
47 Anabatumuulira ulugungu, gira lubashereegeze imizabibu,
lushereeze kiri neꞌbiti byeꞌmitiini.
48 Yulwo lugungu lwanakizi yita ku ngaavu zaabo.
Kiri neꞌbibuzi, anakoleesa inguba mu kubiyita kwo.
49 Rurema anabayereka ubute bwage,
mu kubatumira abashereeza baꞌbaganda, gira bakizi genda bagabayita.
Emwe! Âli shavwiri bweneene, anâli koli rakiiri.
50 Atanayishuhiza ku buraakari bwage,
si akabuyerekana mu kukizi bayita ku njira yeꞌkiija.
51 Anayita ifula zooshi zaꞌBamiisiri,
kundu bo bâli riiri nga migamba yabo.
52 Ha nyuma, Rurema anarongoora abandu baage nga bibuzi,
mu kubalyosa i Miisiri, halinde mwiꞌshamba.
53 Âli kizi barongoora bwija, halinde banaba noꞌbutoge.
Halikago, abagoma baabo boohe, banaherera booshi mu nyaaja.
54 Rurema analeeta Abahisiraheeri ku lubibi lweꞌkihugo kyage kyeru,
anabanyagira kyo, kundu kyâli riiri kyeꞌmigazi.
55 Anayimula abandu beꞌgindi milala imbere lyabo.
Yikyo kihugo, anakiheereza Abahisiraheeri, bube buhyane bwabo,
anabiika ngiisi mulala gwabo mu kaaya keꞌmwabo.
56 Kundu Rurema ali hiꞌgulu lya byoshi, halikago banamúgeza.
Batakasimbaha imaaja zaage, si bakahuna imbere lyage.
57 Na bwo batâli simbahiri Rurema, banashubi gira amabi,
nga bashokuluza baabo ba keera.
Banaba ba busha, ngoꞌmwambi úgwahusha.
58 Banayubakira imigisi yabo imbeero.
Kwokwo, kwo bakayagaza Rurema, anagwatwa noꞌluugi.
59 Rurema, iri akayuvwa ngiisi kwaꞌBahisiraheeri bagweti bagaadeta,
anaraakara bweneene, anabajanda lwoshi-lwoshi.
60 Kwokwo, kundu âli mali tereka iheema lyage iyo munda i Shiilo,
gira akizi tuula mu kati kaꞌbandu, haliko anayami lisiga.
61 Analeka akajumba kaage, kagendi gwatwa imbira.
Kwokwo, kwoꞌbulangashane bwage bukabiikwa mu maboko gaꞌbagoma.
62 Kundu Abahisiraheeri bâli riiri bandu baage, haliko anabarakarira,
analeka bagendi yitwa ku ngooti.
63 Imisore yabo mitabana, umuliro gwanagijigiivya.
Kiri na banyere baabo, banayitwa bátazi yimbirwa mu mageni gaabo.
64 Abagingi baabo, kundu bakayitwa ku ngooti,
haliko banamufwiri baabo, batâli hangwirwi ukubalirira.
65 Lyeryo, Nahano anavyuka, nga úwalyoka mwiꞌro.
Ee! Âli riiri nga úshubi lalusiri, keera atumburukwa,
66 anagendi hima abagoma baage.
Anababonie ishoni, halinde imyaka neꞌmyakuula.
67 Kundu kwokwo, Rurema akalahira beene Yusefu,
atanatoola beene Hifurahimu.
68 Si akayiji toola umulala gwaꞌBayuda.
Ee! Beene Yuda, bâli noꞌmugazi Sayuni, anâli gukuuziri.
69 Haaho, ho akayubakira inyumba yage.
Yanâli shuumiri ngeꞌmigazi.
Yanâli sikamiri, gira ikizi yama ho imyaka neꞌmyakuula,
ngeꞌkihugo kyonyene.
70 Anatoola umukozi wage Dahudi,
anamúlyosa mu bungere bweꞌbibuzi.
71 Kundu âli kizi ragira ibibuzi,
haliko anamúyimika abe mungere waꞌbandu baage, Abahisiraheeri.
72 Dahudi anakizi balanga noꞌmutima mwija,
anakizi barongoora ku bulenga.