81
Abandu baani, bwangabiiri bwija banyuvwe
1 Izaburi ya Hasafu, imwoꞌmwimangizi waꞌbimbi. Luli mu yimbwa ngeꞌnyimbo za beene Gaati.
2 Rurema, ye misi yitu. Tukwaniini tukizi múbandira akabuuli ku bushambaale.
Ee! Tukizi yimbiraga Rurema wa Yakobo.
3 Aaho! Mutondeerage ukuyimba.
Mukizi lasa ingoma, munakizi longeeza inzeeze neꞌbinubi.
4 Mudihirize ibibuga,
gira mumenyeese imbaluko yoꞌmwezi.
Mubidihirize neꞌkyanya umwezi gugaaba keera gwatanguula.
Ee ma! Si kikola kyanya kyoꞌlusiku lwitu lukulu.
5 Twe beene Yakobo, Rurema yenyene ye katubiikira ulubaaja kwo tukizi múyimbira.
Ee! Ye Rurema waꞌBahisiraheeri, ye kakyula kwokwo.
6 Yulwo lubaaja, akabaheereza lwo,
ku kyanya akateera ikihugo kyeꞌMiisiri.
Nanayuvwa izu lyo mundamenywa, liri mu mbwira, ti:
7 «Ikyanya mwâli betwiri imiteekerwa ku bitugo, nꞌgamùtuula yo,
halinde mwanagibiika haashi.
8 Ee! Ikyanya mwâli riiri mu makuba,
mukandabaaza, nanamúkiza.
Ikyanya mwâli hisiri i Meriba, mukayidodomba kwaꞌmiiji ndaakigo,
kyanatuma ngamùgeza ho.
Nanamùshuvya ku njira yoꞌkutuma umukungulo, gugugu!
9 E bandu baani, Abahisiraheeri! Muyuvwe ngiisi kwo ngweti ngamùhanuula.
Ee! Bwangabiiragi bwija munyuvwe.
10 Mu kati kiinyu, mutabonekage imigisi yeꞌmahanga,
mutanakolwe kwo mukizi giyikumba.
11 Si niehe, nie Rurema Nahamwinyu.
Nie kamùlyosa mu kihugo kyeꞌMiisiri.
Kwokwo, muyamuule utunwa twinyu,
gira mbakombeke ibyokulya.
12 «Kundu kwokwo, abandu baani Abahisiraheeri batanandwaza,
banalahira kwo batagakizi nzimbaha.
13 Ku yukwo, nanabaleka bagenderere ukuyumya imitima yabo,
bakizi gira nga ngiisi kwo baloziizi.
14 Bwangabiiri bwija abandu baani banyuvwe.
NgaꞌBahisiraheeri bangagalukiiri imwani,
15 nangabahimiiri abagoma baabo.
Ee ma! Nangakoleesa ubushobozi bwani ku mulindi,
16 halinde ngiisi ábanjombiri bayami nvukamira mu kyoba.
Ikihano kyabo kyangabiiri kyeꞌmyaka neꞌmyakuula.
17 Haliko mwehe, nangamùyigusiizi neꞌngano nyiija,
kuguma noꞌbuuki bwa mu kitiba.»