82
Rurema ye mutwi weꞌmaaja zaꞌba mu kihugo
1 Izaburi ya Hasafu.
Rurema ye yimangiiri umuhumaanano gwa mwiꞌgulu,
ye nali mu twa imaaja zeꞌbindi íbiri mu yikumbwa, ti:
2 «Si muli mu kundirira banangora-mabi!
Aaho! Mugakizi babulanira halinde mangoki?
3 Mugirage mukizi bulanira ifuuvi, na banakahuku,
kuguma naꞌbakeni na ábagoozirwi.
4 Ee! Abakeni na ábatashobwiri babe bo mugaakiza,
mu kubaguluula mu maboko ga banangora-mabi.
5 «Mwe banangora-mabi, si ndaakyo muyiji,
mutanali mu sobanukirwa.
Ku kyanya indaliro zooshi zeꞌkihugo zigweti zigashaganibwa,
muli mu kizi genda mugamamaata mu kihulu.
6 Nꞌgadeta kwokuno: “Mweshi, mulyagagi bamungu!* 82.6 Yohana 10.34.
Ee! Muli baana ba Rurema úli hiꞌgulu lya byoshi.”
7 Kundu kwokwo, mugaafwa nyene, ngaꞌbandi bandu booshi.
Ee ma! Narufu amùgweti, kuguma naꞌbandi batwali booshi.»
8 E Rurema, uyimukage, maashi! Ukizi twa imaaja za booshi ba mu kihugo.
Si abandu baꞌmahanga gooshi bali beꞌmwawe!