83
Amahuuno hiꞌgulu lyoꞌkuhaniiriza bagoma
1 Izaburi ya Hasafu. Ulwimbo.
2 E Rurema, utabe munyerere,
utanayigire nga kimeme, mbu yihulikire naaho.
3 Langiiza ngiisi kwaꞌbagoma baawe bagweti bagalunduma.
Ka utabwini ngiisi kwo bakola bagakuteera?
4 Yabo bagoma, si balyagagi balyalya!
Kundu ukuuziri abandu baawe,
haliko boohe bagweti bagabagirira igambi libi.
5 Balya bagoma bali mu naaka mbu:
«E balya, muyije, tuzimiize abandu baage,
halinde iziina lyaꞌBahisiraheeri, litaki shubi detwa.»
6 Banagweti bagaagira igambi libi hiꞌgulu lyawe,
keera banayibiika kuguma, gira bakuhangirire.
7 Mu kati kaabo, muli Abahedoomu, naꞌBahishimaheeri,
naꞌBamohabu, na beene Hagaari,
8 na beene Gebaali, naꞌBahamooni, naꞌBahamareki,
naꞌBafirisiti, naꞌbatuulaga beꞌTiiro.
9 Kiri naꞌBahasuriya keera bakabayibiikaga kwo,
gira bayushuule beene Luutu mweꞌmisi.
10 Aaho! Ngiisi ábali mu gira yiryo igambi, ubahaniirize.
Kubaagage nga kwo ukahana abandu beꞌMidyani,
kuguma na Siseera na Yabiini, ha lwiji Kishooni.*83.10 Batwi beꞌmaaja 4.2.
11 Yabo bagoma, ukabaminika iyo munda i Heni-Doori,
ku kyanya ibirunda byabo bikabolera i bulambo nga nagiira.
12 Yabo bagoma, abanalushaagwa baabo bafwe, nga Horebu na Zeebu.
Abatwali baabo booshi baminikwe nga Zeeba na Salumuna.
13 Si bakayihaya, mbu: «Mugirage tunyage ikihugo kya Rurema,
tube twe tugakizi kikoleesa nga kwo tuloziizi.»
14 E Rurema wani, ubafuuhe ngana, bayehuuke nga lukungu.
Bakizi ba nga bifuma íbigweti bigayehuulwa neꞌmbuusi.
15 Ubayimulage, neꞌkihuhuuta kyawe kikizi bakumuula.
16 Ukizi basingoola, nga kwoꞌmuliro guli mu singoola ulubako,
na nga kweꞌmbigi zaagwo ziri mu boyola imigazi.
17 E Nahano, uteeze abagoma baawe ishoni,
halinde abandu bakizi kulooza.
18 Balya bagoma bakizi teteerwa, banakizi yama bashengusiri.
Ee! Bagendi fwira ku mbinga.
19 Ubamenyeese ku kasiisa kwiꞌziina lyawe we Nahano.
Wenyene we riiri hiꞌgulu lya byoshi. We na twaziri mu mahanga gooshi.