84
Ukuyidula inyumba ya Rurema
1 Imwoꞌmwimangizi waꞌbimbi. Izaburi yaꞌbaana ba Koora. Luli mu yimbwa ngeꞌnyimbo za beene Gaati.
2 E Nahano woꞌbushobozi bwoshi,
inyumba yawe ibuyahiri bweneene.
3 Emwe! Ndi mu hambiri hola hiꞌgulu lyoꞌkuyifwija kwo ngizi yama mu lubuga lwayo.
E Rurema úli mugumaana, umutima gwani, kiri naꞌmagala gaani, bigweti bigakuberangira.
4 E Nahano woꞌbushobozi bwoshi,
we mwami wani, we na Rurema wani.
Kiri neꞌkisholya kiyubasiri ingisha hoofi naꞌkatanda kaawe koꞌkutangira kwaꞌmatuulo.
Akalembe-lembe nako kali mu kizi giyubaka ho,
kanaberere mweꞌbyananyuni.
5 Bahiriirwi ngiisi ábatuuziri mu nyumba yawe.
Bayamiri bali mu kuyimbira inyimbo zoꞌbwivuge.
6 Bahiriirwi ngiisi ábali neꞌkyedu kwo bayije ku mugazi gwawe.
Boohe bali mu longa ubushobozi imwawe.
7 Ikyanya bali mu lenga mwiꞌshamba lyeꞌBaka, liri mu hinduka kadota.
Neꞌkyanya kyaꞌmahona-nvula, linabe mwaꞌmabenga-mabenga.
8 E Rurema, ikyanya bakiri mu genda i Sayuni, bali mu kizi yushuuka mweꞌmisi,
halinde ngiisi muguma wabo anahulukire yo imbere lyawe.
9 E Rurema wa Yakobo, we Nahano woꞌbushobozi bwoshi.
Kwokwo, undegage amatwiri, we kongwa. Uyuvwe amahuuno gaani.
10 E Rurema, keera ukatoola mwami witu,
ye na siribo yitu.
Aaho! Ukizi múlola kwo, unakizi múgashaanira.
11 Iri nangahisa ulusiku luguma naaho ndi mu nyumba yawe,
luhimiri isiku kihumbi zo nangamaziri ndi handi-handi.
Nanganasiima ukukizi langa imiryango yeꞌnyumba ya Rurema wani,
ho nangatuula mu nyumba za banangora-mabi.
12 Nahano Rurema ye mulengeerwe gwitu, ye na siribo yitu.
Agweti agatugashaanira, iri anatugingika.
Ee! Ngiisi ábayamiri bali buzira mahube, ndaakyo kindu kiija kyo ali mu bayima.
13 E Nahano woꞌbushobozi bwoshi,
bahiriirwi ngiisi ábakubiisiri kwoꞌmulangaaliro.