88
E Nahano, ngweti ngakutabaaza
1 Imwoꞌmwimangizi waꞌbimbi. Izaburi yaꞌbaana ba Koora, na Hemani, Umuhizira. Luli mu yimbwa ngoꞌlwimbo lwoꞌmwizingeerwe.
2 E Nahano Rurema, we mu ngiza.
Aaho! Ngola mu kulirira mwiꞌzuuba, kiri na bushigi.
3 Na bwo ndi mu kutabaaza, unyuvwagwe.
Yago malira gaani, ukizi gayuvwa, maashi!
4 Amalibu gaani gakoli leeziri ulugero.
Na buno, ngola bu fwa.
5 Bakola mu mbaruura nga mundu muzira misi,
na nga mundu úkola úgayikira mu shinda.
6 Bakola mu mbaruulira mu bafwiri,
nga mundu keera úkayitwa, anakoli lambamiri mu shinda.
Yabo abafwiri, kiri na naawe, utakiri mu bakengeera,
utanakiri mu bahahala.
7 Si ukandibulira mu kirimbi-rimbi,
na ngola mu kihulu kya namudidi!
8 Ukoli ndakariiri, neꞌmidunda yawe keera yanvindiriza,
kyo kitumiri ngoli zidohiirwi bweneene.
9 Keera ukahanguula abiira baani kwo banyihandule kwo,
na ngolaga kyagaza imwabo.
Ngoli fyedesirwi, ndanaki hiiti ubulyo bwoꞌkufuushuka.
10 Guno mwizingeerwe, gwo gutumiri amasu gaani gataki bwini.
E Nahano, ngiisi lusiku ndi mu kizi kulirira,
na nyamiri nguteziri amaboko.
11 Ewe! Birya bitangaaza byawe, ka wangabiyerekaga abafwiri?
Ka ábakoli fwiri bangazuuka, mbu bayiji kuyivuga? Nanga, maashi!
12 Si urukundo lwawe, lutali mu detwa mu shinda!
Ubwemeera bwawe, butali mu ganuulwa mu kuzimu.
13 Ibisoomeza byawe, bitamenyekiini yaho áhali ikihulu.
Kundu uli mu gira íbikwaniini,
bitangaki menyeekana haꞌbandu bali mu yibagirwa.
14 E Nahano, ngweti ngakutabaaza, maashi!
Ngiisi shesheezi, amahuuno gaani gali mu kuhikira.
15 Aahago! Kituma kiki uki gweti uganjandirira?
Si wambisha amalanga gaawe!
16 Ukulyokera mu busore bwani, ndi mu kizi libuuka,
na nyamiri ndi mu zeera ho nangasiga itwe.
Kundu kwokwo, ugweti ugandeeza mweꞌkinyukura,
na ngoli shengusiri ngana.
17 Si uyamiri undakariiri!
Na bwo uli mu ndeeza mweꞌkinyukura, ngola ngashereera.
18 Kirya kinyukura, kigweti kiganyifuka kwo nga migezi,
kinakoli nzokaniini.
19 Abiira naꞌbakundwa baani, booshi keera ukabanjaagiza.
Ikihulu naaho, ye koli ba mwira wani.