89
Kukengeeza Rurema imihango yage hiꞌgulu lya Dahudi
Izaburi ya Hetani, Umuhizira.
E Nahano, ngakizi yimba hiꞌgulu lyoꞌrukundo lwawe,
halinde imyaka neꞌmyakuula.
Mu bibusi byoshi, ngakizi menyeesa ngiisi kwo uli mwemeera,
na ngiisi kwoꞌrukundo lwawe luyamiri ho.
Nga kwiꞌgulu liyamiri ho,
kwo na kwokwo, naawe uyamiri uli mwemeera.
 
Nahano akadeta, ti: «Keera nꞌganywana ikihango na Dahudi, umutoolwa wani,
na ngoli múbiikiiri indahiro kwokuno:
“Abandu ba mwiꞌkondo lyawe, bagakizi twala, halinde imyaka neꞌmyakuula.
Ee! Ubwami bwawe, butâye here.”»
 
E Nahano, ikyanya uli mu gira ibisoomeza,
igulu liri mu kizi bihuuza.
Na bwo uyamiri uli mwemeera,
abataluule baawe bali mu kizi kuyimbira.
E Nahano, yaho mu kyanyaanya, nyandi úwangakuyegeera?
Mu bindi byoshi íbiri mu yikumbwa, si ndaakyo íkikushushiri!
E Rurema, mu muhumaanano muhamu gwaꞌbandu bataluule,
we bagweti bagagingika.
Uli wa kahebuuza bweneene, ukuhima booshi ábakuzungulusiri.
E Nahano Rurema woꞌbushobozi bwoshi, si we mwene ubukalage bweneene,
unayamiri uli wa kuyemeerwa!
10 Inyaaja, kundu zangaba ziri mbamu bweneene, haliko we riiri hiꞌgulu lyazo.
Imidunda yazo, kundu yangabirinduka, we gweti ugagihoohya.
11 We kayita ikihuume Rahabu, mu kukifuta-futa,
wanashaabula abagoma baawe ku bukalage bwawe.
12 Igulu liri lyeꞌmwawe! Neꞌkihugo, kwo na kwokwo!
Ee! We kabumba ikihugo kyoshi, na byoshi íbikiri mwo.
13 We kabumba uluhande lweꞌmbembe, kiri na lweꞌkisaka.
Imigazi yeꞌTaboori na yeꞌHerimooni, igweti igakuyimbira ku bushambaale.
14 Ukuboko kwawe kulyagagi noꞌbushobozi.
Ee! Kuli noꞌbushobozi bweneene, kunali mu huuzibwa.
15 Ikitumbi kyawe kisikamiiri ku bikwaniini.
Urukundo noꞌkuli biri mu gwanwa imbere lyawe.
16 E Nahano, bahiriirwi ngiisi ábakoli yiji ukukuyivuga.
Yabo, bo bagaaba batuuziri mu mulengeerwe gwawe.
17 Umulege-rege gwoshi, bali mu shiiba bagweti bagashambaalira iziina lyawe,
banayamiri bali mu kuhuuza, bwo uli mu gira íbikwaniini.
18 We bulangashane bwitu, we na misi yitu!
Tuli mu kizi hima abagoma ku butabaazi bwawe.
19 E Nahano, we Mutaluule waꞌBahisiraheeri.
We nali mu kizi tulanga.
 
Buno, keera watuheereza umwami witu.
20 Wâli mali gwanwa wabwira abandu baawe bemeera mu kati kaꞌmabone kwokuno:
«Mwe bandu baani, keera nꞌgamùtoola mwe ndwani.
Keera nꞌgamúheereza imisi, nanamúkuza.
21 Uyo mundu ye nꞌgatoola, ye mukozi wani Dahudi,
keera nanamúshiiga amavuta mataluule.
22 Ku bushobozi bwani, ngakizi músikamya,
halinde anakizi ba kihagarusi.
23 Abagoma batâye múramburiise.
Banangora-mabi nabo, batâye múhime.
24 Si yabo bagoma baage, ngabafutira-futira imbere lyage!
Ee! Ngabaminika booshi.
25 Uyo Dahudi, nyamiri nimúkuuziri bweneene, nganakizi ba mwemeera imwage.
Bwo ali mundu wani, ngakizi múkuza ngana-ngana.
26 Ngamúyushuulira ubutwali bwage, ukulyokera ku nyaaja Mediterane,
halinde ku lwiji Hefuraati.
27 Uyo Dahudi agambwira, ti: “Wehe, we daata, unali we Rurema wani.
Ee! Uli lwala lwani, unagweti ugangiza.”
28 Uyo Dahudi, ngamúhindula abe ye fula yani,
agaanaba asumbiri abaami booshi ba mu kihugo.
29 Nyamiri ngakizi múkunda, halinde imyaka neꞌmyakuula.
Ikihango kyo tuganywana twe naye, kitâye male.
30 Abaana baage, ngakizi bayimika, babe baami baani.
Isiku zoꞌbwami bwage, ngazilaahya, nga kwokulya igulu liyamiri ho.
 
31 «Kundu kwokwo, halyagagi ikyanya aba mwiꞌkondo lyage bagajanda imaaja zaani,
batanakizi simbaha amigirizo gaani,
32 banabe bahongola birya byoshi byo nꞌgakyula,
banabe bataki simbahiri ngiisi kwo nꞌgategeka.
33 Haaho, ngabahaniiriza ku byaha byabo,
mu kubakubula ingoni.
34 Kundu kwokwo, ndâye leke ukukunda Dahudi,
ndanâye múyihindulire ku muhango gwani.
35 Ikihango kyo keera tukanywana, ndangakiyita.
Ee! Ngiisi byo nꞌgadeta, byo na byebyo.
36 Keera nꞌgabiika indahiro.
Na bwo ndi mweru bweneene, ndangabwira Dahudi ibibeesha.
37 Abandu beꞌkibusi kyage, bagayama ho imyaka neꞌmyakuula.
Ubwami bwage, bugakizi yama imbere lyani,
nga kwiꞌzuuba liyamiri ho.
38 Kiri noꞌmwezi, nga kwo kali kamasi kemeera mwiꞌgulu,
kwo na kwokwo ubwami bwage bugagenduuka.»
 
39 Halikago e Rurema, ulya mwami, kundu wâli mali mútoola,
si ukola mu múrakarira bweneene, unakoli mújandiriiri.
40 Ikihango kyo ukanywana noꞌlya mukozi wawe, keera ukakiyita.
Noꞌlushembe lwage, keera waluvuruguuza mu luvu.
41 Inzitiro zaꞌkaaya kaage, keera ukazihongola.
Ngiisi ho ashubi sikamiiri, hakola mushaka.
42 Abalenga-njira bo bakoli lengi kashahula mweꞌbindu.
Abatuulani baako, bakoli gweti bagamúhonyoleza, ti honyo!
43 Ee! Yabo bagoma baako, keera wabaheereza imisi, babe bihagarusi.
Na buno booshi, keera wanabashambaaza.
44 Uyo Dahudi, keera wativya ingooti yage,
halinde atakiri mu hima mwiꞌzibo.
45 Yoho wee! Ubulangashane bwage bwoshi, keera wabumala.
Kiri neꞌkitumbi kyage, wakinyanyaga haashi.
46 Isiku zoꞌbusore bwage, wanaziyofihya kwo,
keera wanamúteeza ishoni imbere lyaꞌbandu.
 
47 E maashi Nahano, ugakizi yibisha, halinde mangoki?
Si uburaakari bwawe, buki genderiiri ukukizi yaka!
48 Ukengeerage ngiisi kweꞌsiku zaani ziri nyoofi bweneene.
Ee! Kundu ukabumba abandu,
si booshi balyagagi ba kufwa naaho.
49 Ee ma! Ndaaye úwâye yame ho, buzira kufwa.
Ndaanaye úshobwiri ukuyiyeka Narufu.
50 E Nahano, keera ukabiikira Dahudi indahiro,
kwo ugakizi yama umúkuuziri bweneene.
Aahago! Yulwo rukundo lwawe, lukolaga hayi?
51 E maashi Nahano, ulole umukozi wawe,
ngiisi kweꞌbinyamahanga bikola mu múyamiriza, wa yuuhu!
Si bikola mu múhonyoleza bweneene!
Iyo mihonyolezo yabo, igweti igalyaniisania imitima.
52 E Nahano, kundu ukandoolaga mu kunjiiga amavuta,
haliko, baki gweti baganyamiriza-nyamiriza naaho.
Ngiisi ho ndi mu genda, bakola mu mbonyoleza naaho.
 
53 Nahano akizi yama ali mu yivugwa imyaka neꞌmyakuula.
Bikizi ba kwokwo! Ee! Bikizi ba kwokwo.