92
Buli bwija tukizi huuza Nahano
1 Izaburi hiꞌgulu lyoꞌlusiku lweꞌSabaato.
2 E Nahano, we Rurema úli hiꞌgulu lya byoshi.
Buli bwija tukizi kutangira kongwa, iri tunakuhuuza, mu kukuyimbira.
3 Ee! Buli bwija, tukizi huuza urukundo lwawe ngiisi shesheezi.
Na ngiisi bushigi, tunakuhuuze ngiisi kwo uli mwemeera.
4 Ukizi lakizibwa inzeeze.
Ikinubi nakyo, kikizi laka kwiꞌzu írilongiiri.
5 E Nahano, ngiisi byo ugweti ugaakola, binjambaziizi,
kyo kitumiri ngakizi yimba ku bushambaale.
6 E Nahano, ngiisi byo uli mu salira,
biri bya kahebuuza bweneene.
Kiri neꞌmikolezi yawe, kwo na kwokwo.
7-8 Banangora-mabi, kundu bangadeha nga kishuka, banakizi genduukirwa,
haliko ubuzinda, bagashereera imyaka neꞌmyakuula.
Yibyo byoshi, ibizeeze bitangabimenya.
Abahwija batangabisobanukirwa.
9 E Nahano, uyamiri uli mu huuzibwa imyaka neꞌmyakuula.
10 Haliko, abagoma baawe boohe, ku kasiisa ugabashereeza.
Ee! Yabo banangora-mabi booshi, ugakizi bashaabula.
11 Ukambeereza imisi nga yeꞌmbogo,
wananjiiga amavuta, mu kunguza.
12 Nꞌgayibonera nienyene ngiisi kwaꞌbagoma baani bakahimwa.
Ikyanya bakaliruuka, nanayiyuvwirwa.
13 Haliko, ngiisi ábakwaniini boohe, bagweti bagadeha nga kigazi,
banali mu kula nga kiti kila kyoꞌmwerezi gweꞌLebanooni.
14 Ee ma! Bali mu ba, nga myerezi mibyale mu nyumba ya Nahano.
Yabo, bagakizi gangaala bwija mu lubuga lweꞌnyumba ya Rurema witu.
15 Kiri neꞌkyanya bagaaba bakola bashaaja,
bagaaba bakiri bagumaana.
Ee! Bagaaba bakiri naꞌmakama,
banabe bakiri mu tongeka.
16 Bagakizi deta kwokuno: «Nahano ye kwaniini!
Yehe ye lwala lwani. Ndaanabwo buligo úbumúli mwo.»