96
Nahano ye mwene ubulangashane
1 Mukizi yimbira Nahano ulwimbo luhyahya.
Ee! Mukizi múyimbira, mwe bandu baꞌmahanga gooshi.
2 Mukizi yimbira Nahano, iri munayivuga iziina lyage.
Ngiisi lusiku, mukizi menyeesa ngiisi kwo agweti agaakiza.
3 Mukizi menyeesa ubulangashane bwage mu binyamahanga.
Mumenyeese abandu booshi imikolezi yage ya kahebuuza.
4 Nahano ye mukulu. Ye na kwaniini ukuyivugwa.
Ee! Ye kwaniini ukugingikwa, ukuhima abandi ábali mu yikumbwa booshi.
5 Birya abandu beꞌmahanga bali mu yikumba, si iri migisi naaho!
Haliko, Nahano ye kabumba igulu.
6 anayamiri ali mwoꞌlushaagwa noꞌbulangashane.
Mu nyumba yage, abuyahiri bweneene mu kati koꞌbushobozi.
7 E bandu baꞌmahanga gooshi!
Bwo Nahano ye mwene ubulangashane noꞌbushobozi, mukizi múhuuza.*96.7-9 Zaburi 29.1-2.
8 Mukizi huuza ubulangashane bwage, bwo ye mwene bwo.
Munakizi múleetera ituulo mu mbuga zeꞌnyumba yage.
9 Mukizi múyikumbira Ahandu haage Heeru.
Mwe bandu beꞌbihugo byoshi, mukizi juguma imbere lyage.
10 Mukizi deta mu mahanga, ti: «Nahano ye mwami.
Agaanatwa imaaja zaꞌbandu booshi mu kati koꞌkuli.
Ikihugo kidediiri, kitanâye jugumbane.»
11 Igulu, likizi shagaluka.
Neꞌkihugo, kikizi shambaala.
Kiri neꞌnyaaja ibindule, na byoshi íbiri mwo.
12 Imbingiro na ngiisi íbiziri mwo, nazo zikizi shambaala.
Kiri neꞌbiti byeꞌrubako, bikizi yimba ku bushambaale imbere lya Nahano.
13 Mukuba, ye gayiji twa imaaja zaꞌbandu booshi mu kihugo.
Ee! Ngiisi ábatuuziri mu kihugo,
agayiji twa imaaja zaabo ku njira íkwaniini, na mu kati koꞌkuli.