95
Tukizi yimbira Nahano ku bushambaale
1 Muyije, tukizi yimbira Nahano ku bushambaale.
Tukizi múbandira akabuuli, awi yiyi yiyi!
Mukuba, Nahano ye Lwala lwo tuli mu kizibwa mwo.
2 Kwokwo, tukizi yija imbere lyage, tugweti tugatanga kongwa,
iri tunamúyimbira inyimbo zoꞌbwivuge.
3 Nahano, ye Rurema yenyene, anali mukulu bweneene.
Ye mwami úkuliiri bweneene abandi ábali mu yikumbwa booshi.
4 I kuzimu, iri yeꞌmwage.
Kiri naꞌmarango ku migazi, gali geꞌmwage.
5 Inyaaja ziri zeꞌmwage, bwo ye kazibumba.
Kiri noꞌbulambo, akabubumba yenyene.
6 Aaho! Bwo Nahano ye katubumba,
muyijage, tuyiname imbere lyage, mu kumúyikumba,
tukizi múfukamira.
7 Mukuba, ali Rurema witu, ye nali mu tuhahalira.
Tuli bibuzi byage, anagweti agatulanga bwija.* 95.7-11 Baheburaniya 3.7-11, 15; 4.3, 5, 7.
Bwangabiiri bwija, mukizi yuvwiriza izu lyage zeene.
8 Mukuba, Nahano adetaga kwokuno:
«Mutashubi yumuusa imitima yinyu,
nga kwo bashokuluza biinyu bakagira i Meriba,
na nga kwo bakagira mwiꞌshamba lyeꞌMasa.
9 Kundu bâli kizi bona ibitangaaza byo nâli kizi bagirira,
haliko bâli kizi ngeza-ngeza naaho, iri banambigiiriza.
10 Kyanatuma yikyo kibusi, ngaahisa imyaka makumi gana ngirakariiri.
Nanadeta: “Yaba bandu, imitima yabo iyamiri igweti igahabuka.
Ikyanya ndi mu bayereka ngiisi byo ndi mu gira, batali mu ndwaza.”
11 Kyo kitumiri nꞌgashiikiza ku buraakari bwani kwokuno:
“Yabo bandu batâye yingire mu buluhuukiro bwani.”»