94
Rurema ye mwene ukuyihoola
1 E Rurema Nahamwitu, we mwene ukuyihoola.
Ee! We mwene ukuyihoola.
Aahago! Ukizi tutanguulira ubulangashane bwawe.
2 Uyimukage, maashi!
Si we mu twa imaaja zaꞌbandu booshi mu kihugo.
Aaho! Ngiisi ábagweti bagayikangaata,
ugire ubahane nga kwo bibakwaniini.
3 E Nahano, banangora-mabi bagaahisa halinde mangoki
bagweti bagayiheemya?
4 Yabo banangora-mabi, si booshi bali mu yikangaata,
banayamiri bali mu yihaya naaho!
5 E Nahano, yabo babi bagweti bagafutiiriza abandu baawe,
halinde abeꞌmwawe, banalibuzibwe bweneene.
6 Yabo babi, bali mu yita banamufwiri, neꞌfuuvi,
kiri na ábakayiji tusembeera mwo.
7 Bali mu deta kwokuno:
«Si Nahano Rurema wa Yakobo, atabwini!
Ngiisi byo tugweti tugaagira, atali mu bilola.»
8 E bizeeze, mutee yisaliza bwija.
Si mulyagagi bahwija ngana! Ka mutâye tumburukwe?
9 Si Rurema ye kabumba ukutwiri, anali mu yuvwa!
Ye kabumba niꞌsu, anayamiri ali mu bona.
10 Rurema, ye mu yerekeza ibinyamahanga.
Aahago! Na niinyu, ka atagamùhaniiriza?
Rurema, ye mu yigiriza abandu.
Ka angaki bulirwa noꞌbumenyi?
11 Ngiisi byaꞌbandu bali mu salira,
Nahano ayiji-yiji kwo biri bya busha-busha!*94.11 1 Bakorindo 3.20.
12 E Nahano, ahiriirwi ngiisi ye ugweti ugayerekeza,
unali mu múyigiriza imaaja zaawe.
13 Kundu angalonga amakuba, si ugaki múluhuula.
Haliko, banangora-mabi boohe, bakoli humbiirwi ubuhya.
14 Nahano atâye jandirire abandu baage,
atanâye bayikarabe. Si bali buhyane bwage!
15 Imaaja zaabo, zigashubi twibwa mu kati koꞌkuli.
Ngiisi bandu boꞌkuli, bagakizi zikulikira.
16 Aahago! Balya banangora-mabi, nyandi úgandabaala mu kubalwisa?
Nyandagi úgayimanga, gira tugendanwe, tubalwise?
17 Nahano átaki be ye gandabaala,
nga keera namirwa na Narufu.
18 E Nahano, ikyanya nꞌgakutabaaza, mbu ulushando lwani lukola mu tyerera,
haaho wanayami nzikamya mu kati koꞌrukundo.
19 Neꞌkyanya nâli yuvwiti ingerania,
wanamboleeza, halinde umutima gwani gwanashambaala.
20 Abaami babi, ka byangaziga kwo muyijibane? Nanga maashi!
Si ikyanya bali mu kyulaga, lyo bali mu leeterana amalibu!
21 Bali mu yibiika kuguma, gira bahagane na ábakwaniini,
banakyule kwo bagendi yitwa.
22 Kundu kwokwo, Nahano Rurema ye gweti úgakizi njuutira.
Anali ye lwala lwo ndi mu tibitira mwo.
23 Yabo babi, ikyanya bali mu yifunda mu byaha,
Rurema ali mu bayihoola.
Ee ma! Bwo bali mu kizi gira íbitali nga byo,
Rurema Nahamwitu agaki baminika, halinde batanaki be ho.