103
Ukizi huuza Nahano
1 Izaburi ya Dahudi.
E mutima gwani, ukizi huuza Nahano.
Ngiisi íbindi mwo, ukizi huuza iziina lyage, kwo liri litaluule.
2 Ukizi huuza Nahano,
utanayibagire ngiisi kwo uli mu genduukirwa mu kati kaage.
3 Ibyaha byani byoshi, Nahano ali mu bikoga.
Naꞌmalwazi gaani gooshi, ali mu gakiza.
4 Kiri neꞌkyanya ndi mu teerwa na Narufu, ali mu ngiza kwakundi.
Nahano ayamiri anguuziri,
anali mu nyuvwirwa indengeerwa,
5 anali mu kizi mbeereza íbiri biija.
Imisi yo nâli hiiti mu busore bwani, ali mu shubi gimbeereza buhyahya.
Ali mu ngira mbe muhyahya, nga kwo ali mu tabaala nyunda.
6 Ngiisi ábakoli kandamiirwi, Nahano ali mu batabaala,
nga ngiisi kwo bibakwaniini.
Anali mu batwira imaaja mu kati koꞌkuli.
7 Nahano âli kizi yiyerekana imunda Musa,
anakizi koleesa imikolezi yage mu Bahisiraheeri booshi.
8 Nahano, ye mwene indengeerwa, ye na mwene imigashani.
Atali mu yagalwa duba-duba, si ayijwiri mwoꞌrukundo.
9 Atayamiri ali mu tulega isiku zooshi.
Noꞌbute bwage, butagayama ho.
10 Kiri neꞌkyanya ali mu tuhana,
atali mu kulikiriza ibyaha biitu, nga ngiisi kwo biri.
11 Nga kwiꞌgulu liryagagi hala bweneene neꞌkihugo,
kwo na kwokwo urukundo lwage lulenguusiri imwa ábamúsimbahiri.
12 Nga kweꞌmuga halyagagi hala ngana neꞌsheere,
kwo neꞌbyaha biitu, ali mu bilasha hala bweneene.
13 Nga kwo yishe waꞌbaana ali mu bayuvwirwa indengeerwa,
kwo Nahano naye ali mu giyuvwirwa ngiisi ábamúsimbahiri.
14 Nahano ayiji bwija ngiisi kwo akatubumba,
anakengiiri kwo tubumbirwi mu luvu naaho.
15 Umwana woꞌmundu, isiku zaage ziryagagi niini bweneene, nga kishuka,
zinali mu lenga duba nga twaso.
16 Ikyanya imbuusi iri mu huusa,
akaaso kanayami yehuuka.
Kiri na ho kashuba, hatanaki kengeerwe.
17 Si ngiisi ábasimbahiri Nahano,
ayamiri abakuuziri, halinde imyaka neꞌmyakuula!
Ali mu kizi gira íbikwaniini, halinde ku bibusi byabo byoshi.
18 Biri mu ba kwokwo imwa booshi ábasimbahiri ikihango kyage,
banabe bakengiiri ukukizi simbaha imaaja zaage.
19 Nahano ateresiri ikitumbi kyage mwiꞌgulu,
anakoli twaziri hiꞌgulu lya byoshi.
20 Aaho! Mwe baganda ba Nahano! Mukizi múyivuga.
Ikyanya ali mu mùlungika, munabe mumúsimbahiri.
21 Ee ma! Mukizi múyivuga, kwo muli binoono neꞌbinoono.
Si mulyagagi bakozi baage naaho! Aaho! Mukizi gira nga ngiisi kwo aloziizi.
22 Mwe bindi biremwa byage byoshi kwakundi! Mukizi múhuuza.
Ee ma! Mukizi múhuuza hooshi mu butwali bwage.
E mutima gwani, ukizi huuza Nahano.