104
E mutima gwani, ukizi yivuga Nahano
1 E Rurema Nahamwitu, we riiri hiꞌgulu lya byoshi.
We mwene ubulangashane, we na mwene ukugingikwa.
Ku yukwo, ngwaniini ngizi kuhuuza ku mutima gwani gwoshi.
2 E Nahano, umulengeerwe gukusokaniini nga kyambalwa,
unagweti ugayajuula igulu ngiꞌheema.
3 Keera ukayubaka akaaya kaawe ku miiji mwiꞌgulu,
unagweti ugasuula umulindi mu bibungu, nga úli mwiꞌgaari.
Uli mu balala mwiꞌgulu, nga kwaꞌkanyuni kali mu balala neꞌbyubi.
4 Uli mu kizi tuma abaganda baawe, babe nga mbuusi.
Kiri neꞌmilavyo, uli mu kizi gikoleesa.*104.4 Baheburaniya 1.7.
5 We kabumba ikihugo.
Na bwo ukakisikamya ku ndaliro zaakyo, kitâye shaganibwe.
6 Yikyo kihugo, wâli kibwikiiri naꞌmiiji mingi, nga mulondo.
Ee! Gâli bwikiiri kiri noꞌtunywangi-nywangi tweꞌmigazi.
7 Yago miiji, ikyanya ukagakanukira, ganayami nyerera.
Ee! Gakayuvwa kwo ukoli rakiiri, ganayami tibita.
8 Ikyanya ukashungika,
imigazi ikashona halinde mwiꞌgulu,
neꞌndekeera zanayikira ho zikola.
9 Kiri neꞌnyaaja zooshi, wanazibiikira imbibi,
gira zitashubi bwikira ikihugo kyoshi.
10 Yumwo mu ndekeera, wanabiika mweꞌshyoko.
Inyiiji zaazo, ziri mu kizi hinga mu misima.
11 Mwomwo, mweꞌnyamiishwa zooshi ziri mu kizi longera amiiji.
Kiri na bapunda ba mu kishuka, haaho ho bali mu kizi twira inyoota.
12 Ha butambi lya yizo nyiji, hali ibiti byoꞌtunyuni tuli mu yiji yubaka kweꞌngisha.
Mu matavi gaabyo, mwo tuli mu kizi lakira.
13 Mu kyanyaanya, mwo ugweti ugalyosa invula, gira ikizi lovya imigazi.
Ikyanya uli mu kola, ikihugo kinakizi gashaanirwa.
14 Ikyanya uli mu tanduula ibitugwa, uli mu kizi bimegeza ubwasi.
Kiri naꞌbandu, uli mu kizi bamegeza imbuto kwiꞌdaho,
halinde bakizi longa byo bagaalya.
15 Tuli mu longa idivaayi yoꞌkutushagalusa.
Tunali mu longa amavuta geꞌmizehituuni, lyo tukizi nyekemba.
Tunali mu longa umukate gwoꞌkukizi tuheereza imisi.
16 Nahano, ye kabyala ibiti byeꞌmyerezi i Lebanooni,
binali mu longa amiiji ku bwingi.
17 Mu kati ka yibyo biti, mwoꞌtunyuni tuli mu yiji yubaka ingisha.
Utubangarara natwo, tuli mu yiji tuula mu mbako zaabyo.
18 Utunywangi-nywangi tweꞌmigazi, tuli kweꞌbihebe byoꞌtusa.
Na mu nyaala, mweꞌngwavu ziri mu tibitira.
19 Ukabumba umwezi, gira tukizi menya isiku ngulu.
Izuuba nalyo, liyiji-yiji ikihe kyo lyangasookera kwo.
20 Uli mu leeta ikihulu, ubushigi bunayami gwata.
Haaho, inyamiishwa zinatondeere ukugenda zigalooza byo zigaalya.
21 Indare, ikyanya ziri mu gendi looza byo zigavwajagira,
ziri mu kizi lunduma.
Ziri mu lindirira Rurema akizi ziheereza byo zigaalya.
22 Neꞌkyanya izuuba liri mu shubi huluka,
ziri mu galukira kandi mwiꞌbundo.
23 Haaho shesheezi, umundu naye anatondeere imikolwa yage,
anakizi kola, halinde kabigingwe.
24 E Nahano, ngiisi byo uli mu gira, biri katundu.
Ibiremwa byawe byoshi, ukabibumba ku bwitegeereze.
Na buno, bikoli yijwiri mu kihugo.
25 Langiiza inyaaja mbamu, ngiisi kwo iyajabusiri.
Mu kati kaayo, muyijwiri akandaharuurwa keꞌbiremwa, ibihamu neꞌbiniini,
26 mwo munali mu lenga amashuba.
Kiri neꞌkihuume Levyataani, nakyo kituuziri mwo.
Yikyo kihuume, we kakibumba kwo kikizi yoleka-yoleka mwo.
27 Yibyo byoshi, bikubiisiri kwoꞌmulangaaliro,
kwo bigahaabwa ibyokulya ku kihe íkikwaniini.
28 Ikyanya uli mu lambuula ukuboko kwawe mu kubitobera,
biri mu yiguta.
29 Si ikyanya uli mu bihindulira ingoto,
biri mu yami yoboha.
Ikyanya uli mu bilyosa mwoꞌmuuka,
biri mu yami fwa, binashubi hinduka luvu.
30 Neꞌkyanya uli mu shubi fuuha umuuka gwawe,
binashubi bumbwa.
Kwokwo, kweꞌbihyahya biri mu ba ho.
31 Ubulangashane bwa Nahano, bukizi yama ho imyaka neꞌmyakuula,
anabe asiimiri ngiisi kwo akabumba.
32 Ikyanya Nahano ali mu langiiza naaho ku kihugo, kiri mu jugumbana.
Kiri neꞌmigazi, ikyanya ali mu gihuma kwo, iri mu tutumuka kweꞌkyusi.
33 Ku kyanya ngaaba ngiri ho, ngakizi yimbira Nahano,
halinde umuuka gwani gunamale.
34 Ee! Ye mu njambaaza.
Kwokwo, imitono yani ikwaniini ikizi músimiisa.
35 Haliko, banangora-mabi boohe, bazimiizibwe nyene mu kihugo,
halinde bataki shubi boneka mwo.
E mutima gwani, ukizi yivuga Nahano.
Ugenderere ukukizi múyivuga.