105
Ibitangaaza bya Rurema, mukizi bimenyeesania
1 Mukizi tanga kongwa imwa Nahano,
munakizi menyeesania ngiisi kwo ali mukulu.
Ngiisi byo âli kizi kola,
mukizi bimenyeesa mu binyamahanga byoshi.
2 Mukizi múyimbira.
Mukizi múyimbira inyimbo zoꞌbwivuge.
Ibitangaaza byage, mukizi bimenyeesania.
3 Mukizi huuza iziina lyage, kwo liri lyeru.
Ngiisi ábali mu yikumba Nahano, mukizi shambaala.
4 Mukizi looza Nahano, mulooze neꞌmisi yage.
Mukizi yidula ukumúbona isiku zooshi.
5 Mukizi kengeera ngiisi kwo Nahano âli kizi gira ibisoomeza,
na ngiisi kwo âli kizi twa imaaja.
6 E bandu ba mwiꞌkondo lya Hiburahimu,
munali beene Yakobo. Mwehe, mwe Rurema atooziri.
7 Ye Nahano, Rurema witu.
Kiri na mu mahanga gooshi,
ye mu twa mweꞌmaaja.
8 Nahano ayamiri akengiiri ikihango kyage,
agaanaba akisimbahiri, halinde ukuhisa ku bandu beꞌbibusi kihumbi.
9 Yikyo kihango, akatee kinywana bo na Hiburahimu,
anakibiika kweꞌndahiro imwa Hisake.
10 Kiri neꞌmwa Yakobo, akakisisa.
Anakinywana kiri naꞌBahisiraheeri, kikizi ba kyeꞌmyaka neꞌmyakuula.
11 Anadeta: «Ngamùheereza ikihugo kyeꞌKaanani,
kikizi ba buhyane bwinyu.»
12 Ikyanya Nahano akabalagaania kwokwo,
bâli ki riiri bagerwa naaho,
nga binyamahanga mu kihugo kyeꞌKaanani.
13 Banakizi jeba-jeba mu mahanga,
ukushaaga ku bwami buguma halinde ku bundi.
14 Kundu kwokwo, Rurema atanahanguula kwo hagire umundu úgabalibuza.
Si hiꞌgulu lyabo, anakanukira abaami, ti:
15 «Yaba batoolwa baani, mutakolwe mbu mukizi balibuza.
Mutanagirire abaleevi baani ubuligo.»
16 Yaho mu kihugo kyeꞌKaanani, Nahano akashalisa abandu baage.
Ngiisi ho bâli kizi longera ibyokulya,
anabaleetera umwena naaho.
17 Kundu kwokwo, âli mali gwanwa atuma Yusefu i Miisiri,
mu kumúguliisa, abe muja.
18 Uyo Yusefu, banamúlashaga mu nyumba yeꞌmbohe,
banamúshweka utubangira ku magulu,
banamúsoosa neꞌkindi kyuma mwiꞌgosi.
19 Mukuba, Nahano âli loziizi ukukoleesa ishungi zaage,
mu kukwiza imihango yage.
20 Kyanatuma mwami weꞌMiisiri agatumira Yusefu, anamúlikuula.
Noꞌyo mwami âli riiri mutwali weꞌmahanga.
21 Ulya Yusefu anayimikwa abe mukulu mu butwali bweꞌMiisiri.
Ibindu byoshi byoꞌyo mwami âli hiiti, Yusefu ye wâli bitwaziri.
22 Anakizi rongoora kiri naꞌbaabo bakulu nga ngiisi kwo âli loziizi.
Kiri naꞌbashaaja, anakizi bayigiriza ku bwitegeereze.
23 Ha nyuma, yishe Yakobo, naye anahika mu kihugo kyeꞌMiisiri,
anayiji shumbika mwo.
24 Yabo Bahisiraheeri, Rurema anabaluguusa,
halinde banasumba abagoma baabo.
25 Haliko ha nyuma, anahindulaga imitima yaꞌBamiisiri,
halinde banakizi bashomba.
Kundu Abahisiraheeri bâli ryagagi bakozi ba Rurema,
haliko, Abamiisiri banakizi bagirira igambi libi.
26 Iri hakatama, Nahano anatuma umukozi wage Musa, bali na Harooni.
Mukuba, uyo Harooni, ye akatoola.
27 Yabo bombi, yumwo mu kihugo kyeꞌMiisiri,
banakizi gira ibyereso byeꞌkitangaaza.
28 Kundu kwokwo, yabo Bamiisiri batâli simbahiri imaaja za Rurema,
kyanatuma Rurema agadisa ubwire mu kihugo kyabo.
29 Anahindulaga neꞌnyiiji zaabo zooshi, ibe miko,
halinde ifwi zooshi zanafwa.
30 Ha nyuma, mu kihugo mwanayijula bakere.
Balya bakere, banayigogombeka mu tujumiro, kiri na mu bisiika byatwo.
31 Ha nyuma kandi, Rurema anakyula,
mwomwo mu Bamiisiri, mwanahonera ulumamo lweꞌsaazi.
Kiri neꞌnda zanayijulaga mu kihugo kyoshi.
32 Na heꞌnvula yangatonyiri, ulugungu lwanaba lwo lugaania, kuguma neꞌnguba.
Irya nguba, yanakizi tulagiza mu kihugo kyabo kyoshi.
33 Ikashereeza imilandira yeꞌmizabibu, neꞌbiti byabo byeꞌmitiini,
kuguma neꞌbindi biti byoshi bya mu kihugo kyabo.
34 Rurema anashubi kyula, inzige nyingi zanayiji bateera.
Zirya nzige, zâli kandaharuurwa.
35 Zanakizi lya imbuto zooshi mu kihugo,
halinde indalo zooshi zanashereezibwa.
36 Ubuzinda, mu ngiisi nyumba yaꞌBamiisiri, Rurema anayitaga mweꞌfula.
Zirya fula, yo misi yaꞌBamiisiri, bwo bo bakatangi butwa.*105.36 Ndondeko 49.2.
37 Ha nyuma, Rurema anahulusa abandu baage mu kihugo kyeꞌMiisiri,
bakoli fumbiiti iharija neꞌnooro íbiri tiita.
Mu milala yabo yoshi, ndaaye úkabambaajira.
38 Ikyanya Abahisiraheeri bakalyoka yaho, lyaꞌBamiisiri bakayisa umuuka.
Mukuba, bâli koli bayobohiri bweneene.
39 Yabo Bahisiraheeri, Rurema anababwikira neꞌkibungu.
Neꞌkyanya kya bushigi, anakizi bamolekera noꞌmuliro.
40 Ikyanya Abahisiraheeri bakamúhuuna inyama,
anabaleetera ingware.
Na kwakundi, anabayigusa neꞌmana.
(Kuli kudeta imikate ukulyoka mwiꞌgulu.)
41 Rurema anabalyokeza amiiji mu lwala.
Kundu bâli riiri mwiꞌshamba, yago miiji ganakizi hinga nga lwiji.
42 Mukuba, gulya muhango mutaluule gwo akalagaania
umukozi wage Hiburahimu, âli ki gukengiiri.
43 Kwokwo, kwo akahulusa abandu baage i Miisiri, bakoli shambiiri.
Mukuba, âli mali gwanwa abatoola.
44 Yabo Bahisiraheeri, Nahano anabaheereza utwaya tweꞌbinyamahanga.
Yabo bandi, kundu bakagwanwa babyala imbuto,
haliko Abahisiraheeri bo bakayiji ziyimbula.
45 Na íbitumiri yibyo byoshi bikaba,
gira bakizi kulikira imaaja zaage, banakizi zisimbaha.
Tukizi huuza Nahano!