106
E Nahano, naani ukangengeere
1 Tukizi huuza Nahano!
Mukizi deta kongwa imwage, bwo ali mwija.
Ayamiri ali mu kundana, halinde imyaka neꞌmyakuula.
2 Ibitangaaza byo Nahano agweti agaakola, ndaaye úwangabiharuura.
Ndaanaye úwangamúhuuza nga kwo akwaniini, kiri neꞌhiniini.
3 Bahiriirwi ábali mu kulikira ukuli,
banakizi gira íbikwaniini isiku zooshi.
4 E Nahano! Ikyanya ugakizi tabaala abandu baawe,
na naani, ukangengeere, unandabaale.
5 Ngizi genduukirwa, kuguma naꞌbatoolwa baawe,
tunalonge ukushambaalira kuguma.
Ee! Ndonge ukukizi kuyivuga, twe nabo.
6 Nga kwo bashokuluza biitu bâli kizi yifunda mu byaha,
kwo na nyiitu, tukola mu biyifunda mwo.
Ee! Twâli kizi huba ngana, twanakizi gira amabi.
7 E Rurema, ikyanya bashokuluza biitu bâli ki tuuziri i Miisiri,
wâli kizi gira ibitangaaza.
Kundu kwokwo, batanabitwaza.
Na kundu wâli kizi bayigenderera, haliko batanakukengeera.
Si bakahuna ku butambi bweꞌNyaaja Ndukula.
8 Kundu kwokwo, Nahano anakizi yerekana ubushobozi bwage bweꞌkitangaaza,
mu kukiza abandu baage, gira iziina lyage likizi gingikwa.
9 Anahamuliza Inyaaja Ndukula, mwanatulika injira,
anabaleeza mwo, hakoli yumiri ngiꞌshamba.
10 Ikyanya abagoma bakayiji bateera,
anabaguluula mu maboko gaabo, anabakiza.
11 Balya bagoma, iyo nyaaja yanayami babindikira.
Ndaaye kiri noꞌmuguma wabo úkafuuka.
12 Leero, ngiisi byo Rurema âli mali gwanwa alagaania abandu baage,
banabiyemeera, banakizi múyimbira inyimbo zoꞌbwivuge.
13 Haliko ha nyuma, banakizi yibagira imikolezi yage,
batanalindirira mbu abahanuule.
14 Iyo munda mwiꞌshamba, bâli gwasirwi naꞌmifwije mabi,
banakizi geza Rurema.
15 Kundu kwokwo, ngiisi byo bâli kizi múhuuna, anakizi baheereza byo,
halinde byanabagamba.
Kuguma na yibyo, anabayushuula mweꞌkiija.
16 Yaho mu shumbi, abandu banayuvwirwa Musa uluugi,
bo na Harooni, ulya mugingi mutaluule wa Nahano.
17 Kyanatuma idaho ligayanuuka, lyanamira Datani.
Kiri na Habiraamu neꞌmbaga yage, lyanabafulira.
18 Ha nyuma, umuliro gwanayiji gulumira mu bakulikizi baabo.
Kwokwo, kwo balya banakuhambwa gukasingooka.
19 Yabo bandu, ikyanya bâli riiri ku mugazi Horebu,
banayabiiraga inooro, banatula mwoꞌmugisi gweꞌnyana,
banakizi guyikumba, kundu boonyene bo bakaguyitulira.
20 Ho bangahiiri Rurema ubulangashane,
banagingika umugisi gweꞌkitugwa, kinali kya kuliisa ikishuka.
21-22 Rurema ye kabalyosa mu kihugo kyeꞌMiisiri, ku njira yeꞌbitangaaza bingi,
anabagirira neꞌkindi kitangaaza ku Nyaaja Ndukula.
Kundu kwokwo, banayami múyibagira.
23 Iri hakatama, Rurema anakyulaga kwo agabashereeza.
Halikago umutoolwa Musa, anayitambika ha kati kaage naꞌbandu baage,
anamútakira kwo aleke ukubarakarira.
Kyanatuma atagaki bashereeza.
24 Kundu Rurema akalagaania abandu baage umuhango,
halikago bâli gulahiiri.
Kundu kirya kihugo kyeꞌKaanani kyâli riiri kiija,
haliko banakijajaaka.
25 Banakizi yidodombera Nahano mu maheema gaabo,
iri banalahira mbu batagaki músimbaha.
26 Kwokwo, Nahano analengeza ukuboko,
anabiika indahiro kwo agabaminika booshi haaho mwiꞌshamba.
27 Anadetaga kwo agashabulira kiri naꞌbaana baabo mu mahanga,
halinde bagendi shumbika mwo.
28 Ha nyuma, iyo munda i Pehoori,
banakomeerana na ábâli kizi yikumba umuzimu Baali,
banakizi lya kiri naꞌmatuulo ágâli kizi tangwa imweꞌmizimu.
29 Ikyanya bakagiraga kwokwo,
kyanatuma Nahano agabarakarira bweneene, anabatibulira mweꞌkiija.
30 Haliko, Finehaasi anayimuka, anahuuna ulukogo imwa Rurema,
halinde yikyo kiija kyanamala.
31 Kyanatuma uyo Finehaasi, ukushaagira ku yikyo kyanya,
agakizi haruurwa kwo akwaniini imbere lya Nahano.
32-33 Yabo bandu banayagaza Nahano na ha kirigo kyeꞌMeriba.
Mukuba, Musa akayitulikania mu kudeta amagambo ágatali nga go,
kyanatuma agalongera haꞌmakuba.*106.32-33 Kulyoka 17.1-7; Muharuuro 20.1-13.
34 Balya Bakaanani, Nahano âli mali kyula kwo bayitwe.
Haliko, Abahisiraheeri batanasimbaha.
35 Kundu yabo Bakaanani bâli bapagaani,
haliko Abahisiraheeri banabakombeera, banatondeera ukubayigira kwoꞌmugani.
36 Banatondeera ukuyikumba imigisi yabo,
kiziga iyo migisi, gwaba gwo mutego gwoꞌkubasivya.
37 Yohoo! Yabo Bahisiraheeri banakizi yita bagala baabo na banyere baabo,
mu kukizi batanga amatuulo imweꞌyo mizimu.
38 Yabo baana, ndaabwo buhube bwo bakagira.
Kundu kwokwo, ababusi baabo banakizi yona umuko gwabo.
Neꞌkyanya bâli gweti bagatanga ituulo imweꞌmizimu yeꞌKaanani,
lyo bakayulubaza ikihugo, kyanaba mwoꞌbwitani.
39 Bâli kizi yiyulubaza mu kukizi gira ibihigo.
Neꞌkyanya bâli kizi kunda imigisi,
kwanaba nga kukizi gira ubushule imbere lya Rurema.
40 Kyanatuma Nahano agarakarira abandu baage.
Kundu bâli riiri beꞌmwage, halikago anabanenuuka bweneene.
41 Anabatangaga mu maboko geꞌbinyamahanga.
Yibyo binyamahanga, kwo byâli bashombiri, byanabatwala buligo.
42 Byanakizi bavindagaza,
iri binakizi balibuza ku kahaati.
43 Balya bandu, kundu Nahano âli kizi bakiza,
halikago, banagenderera naaho ukukizi huna.
Kyanatuma ubuzinda, banashereera mu byaha byabo.
44 Kundu kwokwo, Nahano anabona amalibu gaabo.
Ikyanya bakamúlirira, anakizi bayuvwa,
45 anakengeera ikihango kyo bakanywana.
Na bwo âli bakuuziri, anabayuvwirwa indengeerwa,
46 anagira abagoma baabo nabo
bakizi bayuvwirwa indengeerwa.
47 E Rurema Nahamwitu, utukizagye, maashi!
Utukuumanie, unatulyose mu binyamahanga,
gira lyo tukizi huuza iziina lyawe, kwo liri lyeru.
Ee! Tugakizi yiyuvwa, mu kukuyivuga.
48 Nahano Rurema waꞌBahisiraheeri, akizi huuzibwa,
halinde imyaka neꞌmyakuula.
Abandu booshi bakizi deta: «Ee! Bikizi ba kwokwo!
Tukizi huuza Nahano!»