108
Ngavyula umukyo noꞌlwimbo lwani
1 Izaburi ya Dahudi. Ulwimbo.
2 E Rurema, umutima gwani gusikamiri.
Kwokwo, ku mutima gwani gwoshi, ngakizi kuyimbira mu kukuyivuga.
3 Uvyukage, e lulanga, neꞌnzeeze!
Ngavyula umukyo noꞌlwimbo lwani.
4 E Nahano, ngakizi kuyivuga imbere lyaꞌbandu booshi.
Na ngizi kuyimbira inyimbo zoꞌkukuhuuza mu binyamahanga.
5 Mukuba, urukundo lwawe luhisiri halinde mwiꞌgulu.
Noꞌbwemeera bwawe buhisiri mu bibungu.
6 E Rurema, ukizi huuzibwa áhali hiꞌgulu lya mwiꞌgulu.
Ubulangashane bwawe bukizi tanguula mu kihugo kyoshi.
7 E Rurema, ukize abandu baawe, ku bushobozi bwawe.
Ee! Bwo ubakuuziri, ubakizagye, maashi!
8 Rurema, kwo atuuziri mu nyumba yage, adetaga kwokuno:
«Ikyanya ngaaba keera nahima, ngagaba akaaya keꞌShekemu bihande-bihande.
Ngabunduula neꞌndekeera yeꞌSukooti mituli-mituli.
9 Ibihugo byeꞌGiryadi na byeꞌManaasi, biri byeꞌmwani.
Ikihugo kyeꞌHifurahimu, kiri nga ngofeera yani.
Abandu beꞌBuyuda, bafumbiiti ingoni yani yeꞌkyami.
10 Haliko ikihugo kyeꞌMohabu kyohe, guli mutanga gwo ndi mu karabira mwo.
Neꞌkihugo kyeꞌHedoomu, kyo ndi mu laaviza kwaꞌmagulu.
Abandu beꞌBufirisiti, ngakizi bayamiriza kwo nabahima.»
11 Aaho! Nyandagi úgandongoora,
mbike mu kaaya kazitire keꞌHedoomu?
12 Ka utali wehe, e Rurema? Halikago buno, keera watujanda.
Si utakiri mu herekeza abasirikaani biitu mwiꞌzibo!
13 Ututabaalage, maashi! Tulonge ukuhima abagoma biitu.
Mukuba, ubutabaazi bwaꞌbandu buli busha.
14 Rurema, iri angaba ali uluhande lwitu, lyo tugaahima.
Ee! Ye gatuhimira abagoma biitu.