109
E Rurema, utanyisunge
1 Imwoꞌmwimangizi waꞌbimbi. Izaburi ya Dahudi.
E Rurema, we ngweti ngahuuza.
Aahago! Utanyisunge, utanambeere nga kimeme.
2 Si banangora-mabi bali mu kizi ngamba,
iri banambeeshera!
3 Yabo banangora-mabi bali mu ndeta-ndeta ku bushombani naaho,
banali mu kizi ndeera ku kimaama.
4 Yabo bagoma, kundu mbakuuziri, na ngiri mu bahuunira imwa Rurema,
haliko boohe, bali mu gira mbu banjereeze.
5 Ikyanya nꞌgabagirira amiija, banangalulira amabi.
Na kundu mbakuuziri, si boohe, banjombiri!
6 Aahago! Uyo mugoma, umúbiike mu maboko goꞌmundu mubi woꞌkumúyihindulira.
Ulungikage umulezi wage, anamútwire ulubaaja, imbere lyaꞌbatwi baazo.
7 Ee! Ikyanya agalutwirwa, aboneke kwo asindwa.
Neꞌkyanya agahuuna kwo akejeererwe,
kiri yago mahuuno gaage gayerekane kwo ali munabyaha.
8 Uyo mugoma, isiku zaage ziniihibwe.
Noꞌmukolwa gwage guhaabwe ugundi.*109.8 Mikolezi 1.20.
9 Mukaage ahindukage namufwiri.
Naꞌbaana baage basigale fuuvi.
10 Yabo baana baage basigale nzereezi zoꞌkukizi genda zigahuuna-huuna.
Kiri neꞌbiguuka byabo, babiyimulwe mwo.
11 Uyo mugoma, ngiisi ye akalyagaga umwenda,
amúnyage ibindu byage byoshi.
Byoshi byo akayungukaga kwo, ibinyamahanga biyiji binyaga.
12 Hatagire mundu úgakizi múyuvwirwa indengeerwa.
Kiri naꞌbaana bo akasiga, hatagirage úgakizi batabaala.
13 Imbaga yage ihere lwoshi-lwoshi.
Ku kibusi kiguma naaho, iziina lyage lihotolwe.
14 E Nahano, ibyaha bya bashokuluza baabo, ukizi bikengeera.
Kiri neꞌbyaha bya nyina kwakundi, utabihotole.
15 Ukizi kengeera ibyaha byabo ngiisi lusiku.
Si boonyene bayibagirwe lwoshi mu kihugo.
16 Uyo nangora-mabi atagweti agayuvwiranwa indengeerwa.
Si ali mu lyalyania abakeni, balya ábatashobwiri.
Kiri na ábavunisiri umutima, ali mu kizi balibuza,
anabalandirize, halinde ukufwa kwabo.
17 E Nahano, uyo mubi, si asiimiri ukukizi daakana.
Aahago! Kwokwo naawe, ukizi múdaaka.
Na bwo atagweti agagashanirana,
kwokwo naawe, utakizi múgashaanira.
18 Uyo mubi, amagambo giꞌdaaki, agayambiiti nga kyambalwa.
Aaho! Naye, gakwirage mu magala gaage nga magoloovi,
gananywengerere mu mavuha gaage, nga mavuta.
19 Kwokwo naye, yago madaaki gamúbwikire nga mulondo,
gamúsokanaane nga mukaba mu kibuno.
20 Ngiisi ábagweti bagandega,
kwokwo kwo Nahano agakizi bahemba.
Mukuba, bali mu kizi ndeta buligo.
21 E Rurema, Nahamwitu, ungize ku rukundo lwawe, na ku bwija bwawe.
Ngiisi kwo ugakizi ngirira, kukizi ba hiꞌgulu lyoꞌkuhuuza iziina lyawe.
22 Ndi mukeni weꞌmbona.
Noꞌmutima gwani, gukoli lyaniirwi bweneene.
23 Ndi mu ba nga kimbehwa íkiri mu nyerera kabigingwe,
na nyehuulwe nga luzige.
24 Ikyanya ndi mu yishalisa, amadwi gaani gali mu tera.
Na ngoli sigiiri makangara.
25 Abagoma baani bagweti baganyamiriza.
Ikyanya bali mu mbona, bali mu kizi zuuza amatwe gaabo.
26 E Rurema Nahamwitu, undabaalage, maashi!
Ungizagye, ukukulikirana noꞌrukundo lwawe.
27 Yibi ugweti ugaagira,
abandu bamenye kwo wabigira ku bushobozi bwawe.
28 Leka bakizi ndaaka. Halikago wehe, ugakizi ngashaanira.
Ikyanya bagandeera, bagwatwe neꞌshoni.
Si ndi mukozi wawe!
Aaho! Ngagenderera ukukizi shambaala.
29 Yabo bagoma baani, ubateezagye ishoni imbere lya booshi.
Na yizo shoni, zikizi babwikira nga mulondo.
30 Ngweti ngayivuga Nahano bweneene.
Ngakizi múhuuza imbere lyaꞌbandu booshi.
31 Mukuba, ye mu bulanira umukeni.
Neꞌkyanya umukeni ali mu twirwa ulubaaja kwo ahanwe,
Nahano ali mu ba ibiringiini ukumúkiza.