113
Tukizi huuza Nahano
1 Tukizi huuza Nahano!
E bakozi ba Nahano, mukizi múhuuza.
Mukizi huuza iziina lyage.
2 Ee! Iziina lyage likizi huuzibwa,
ukulyokera buno, halinde imyaka neꞌmyakuula.
3 Likizi huuzibwa imunda izuuba liri mu huluka,
halinde ukuhisa imunda liri mu sookera.
4 Nahano ali mu ba akuziibwi hiꞌgulu lyaꞌbandu booshi.
Ubulangashane bwage, buhisiri halinde mwiꞌgulu.
5 Rurema Nahamwitu, twangamúshushirania na nyandi?
Si abwatiiri ku kitumbi kyoꞌbwami mwiꞌgulu!
6 Haaho mwiꞌgulu, ali mu yinama, mu kulangiiza hiꞌfwo mu kyanyaanya,
kiri na hano haashi mu kihugo.
7 Nahano ali mu lyosa banakahuku mu luvu, anabakuze.
Ee! Ali mu kizi bayinamula, bashaage mwiꞌjolera.
8 Yabo bakeni, ali mu kizi babwataza kuguma naꞌbaluzi,
gira bakizi twala abandu baage kuguma.
9 Umukazi, kundu angaba agumbiri,
haliko Rurema ali mu múshambaaza mu nyumba yage, anamúheereze abaana.
Tukizi huuza Nahano!