116
Bwo Nahano akangiza, ngaadeta kongwa
1 Nguuziri Nahano! Mukuba, ikyanya ndi mu mútabaaza,
ali mu nyuvwa.
Ikyanya ndi mu múhuuna kwo angejeerere,
ali mu ndega amatwiri.
2 Na bwo ali mu ndega amatwiri,
ngakizi mútabaaza ku kyanya kyoshi ngaaba ngiri ho.
3 Nâli kolaga imbere lyoꞌlufu.
Imigozi ya Narufu yâli koli ngonyiri.
Nanâli koli shengusiri bweneene.
Nâli gweti ngatulagula, iri na ngerania.
4 Kyanatuma ngatakira Nahano kwokuno:
«E Nahano, ungizagye, maashi!»
5 Rurema Nahamwitu, ali mu tubonera ulukogo.
Ali mu kejererana, mu kati koꞌkuli.
6 Ngiisi ábatashobwiri, ali mu balanga.
Naani, ikyanya nâli koli buziri ubulyo, anangiza.
7 E mutima gwani, si Nahano agweti agakugirira amiija!
Aaho! Ugirage ushubi luhuuka.
8 E Nahano, ikyanya nâli kizi lira, wanambotola imigenge,
wanakizi ndanga, gira ndatyerere,
wanangiza mu lufu.
9 Ku yukwo, ikyanya kyoshi ngaaba ngiri ho,
ngakizi kukulikira.
10 E Nahano, nguyemiiri, kyanatuma ngakutabaaza kwokuno:
«E waliha, ngola mu libuuka bweneene.*116.10 2 Bakorindo 4.13.»
11 Na bwo nâli koli shengusiri, nanadeta:
«Si abandu booshi, balyagagi banabibeesha naaho!»
12 Nahano ali mu ngashaanira bweneene.
Aaho! Biki byo nangamútangira?
13 Ngamúlengereza urusoozo lyoꞌkukengeeza ngiisi kwo akangiza.
Na ngizi tabaaza iziina lyage.
14 Keera nꞌgalagaania Nahano ngiisi byo ngamútangira.
Byo na byebyo, ngamútangira imbere lyoꞌmuhumaanano gwaꞌbandu baage.
15 Abandu ba Nahano, ikyanya bali mu fwa,
naye ali mu lyanirwa bweneene.
16 E Nahano, ku kasiisa, ndi mukozi wawe.
Ee! Nie mukozi wawe, mugala woꞌmuja-kazi wawe.
Keera ukanjwekuula utubangira.
17 E Nahano, ngakutangira ituulo, mu kudeta kongwa,
na ngizi tabaaza iziina lyawe.
18 Ngiisi byo nꞌgakulagaania,
ngakutangira byo imbere lyoꞌmuhumaanano gwaꞌbandu baawe.
19 Ngabitangira mu lubuga lweꞌnyumba yawe,
ha kati kaꞌkaaya Yerusaleemu.
Tukizi huuza Nahano!