115
Mukizi biika umulangaaliro imwa Nahano
1 E Nahano, tutali twe tukwaniini ukulonga ulushaagwa. Si wehe we lukwaniini.
Mukuba, we mwija, unali mwemeera.
2 Kituma kiki ibinyamahanga bigweti bigabuuza kwokuno:
«Aahago! Rurema winyu ali hayi?»
3 E balya, si Rurema witu atuuziri mwiꞌgulu,
anali mu gira nga ngiisi kwo aloziizi!
4 Yibyo binyamahanga, si bali bandu ngana.
Bali mu koleesa amaboko gaabo,
mu kutula imigisi mu harija, na mu nooro.
5 Iyo migisi, kundu iri mu ba noꞌtunwa, si itangadeta.
Na kundu iri mu ba naꞌmasu, si itangabona.
6 Na kundu iri mu ba naꞌmatwiri, si itangayuvwa.
Na kundu iri mu ba naꞌmazuulu, si itangabayiza.
7 Na kundu iri mu ba naꞌmaboko, si itangamamaata.
Na kundu iri mu ba naꞌmagulu, si itangagenda.
Na kundu iri mu ba neꞌbikorokoro, si itangahulusa izu.
8 Haliibwi! Iyo migisi, ngiisi ábali mu gitula, si bagishushiri nyene!
Kiri na ábagibiisiri kwoꞌmulangaaliro, nabo kwo na kwokwo.
9 E Bahisiraheeri, mukizi biika umulangaaliro imwa Nahano.
Si ye mu mùtabaala, ye na siribo yinyu!
10 E beene Harooni, mukizi biika umulangaaliro imwa Nahano.
Si ye mu mùtabaala, ye na siribo yinyu!
11 Mwe musimbahiri Nahano, mukizi múbiika kwoꞌmulangaaliro.
Si ye mu mùtabaala, ye na siribo yinyu!
12 Nahano ayamiri atukengiiri, ye nali mu tugashaanira.
Agakizi gashaanira Abahisiraheeri, kuguma na beene Harooni.
13 Ngiisi ábali mu ba bamúsimbahiri, agakizi bagashaanira.
Ee! Agagashaanira booshi, baba bagunda kandi iri banalushaagwa.
14 Mwe naꞌbaana biinyu, Nahano akizi mùgashaanira.
15 Ee! Nahano abe ye gakizi mùgashaanira.
Mukuba, ye kabumba igulu neꞌkihugo.
16 Íbiri mwiꞌgulu, biri bya Nahano.
Si ikihugo kyohe, akakiheereza abandu.
17 Ábakoli fwiri batali bo bali mu yivuga Nahano.
Ikyanya bali mu ziikwa, kwoshi kwokwo.
18 Si twe tukiri bagumaana, twe tugakizi múyivuga,
ukulyokera buno, halinde imyaka neꞌmyakuula!
Tukizi huuza Nahano!