119
Imaaja za Nahano zikwaniini
1 Bahiriirwi, ngiisi ábali mu gira íbikwaniini,
banabe basimbahiri imaaja za Nahano.
2 Ee ma! Yizo maaja zaage, bayamiri bali mu zisimbaha,
iri banamúlooza ku mutima gwabo gwoshi.
3 Yabo bandu, ndaago mahube go bali mu gira.
Si bagweti bagakulikira ibyeꞌmwage naaho!
4 E Nahano, ukatuheereza imaaja zaawe,
gira tukizi zisimbaha lwoshi-lwoshi.
5 Aaho! Bwangabiiri bwija ngizi fiitirwa,
mu kukizi zisimbaha ngiisi kyanya.
6 Kwokwo, ikyanya ngaaba ngola mu ziyitoneesa kwo,
ndagaki teezibwa ishoni.
7 Ikyanya nꞌgayiji menya kweꞌmaaja zaawe zikwaniini,
nanakizi kuhuuza ku mutima muguma na muguma.
8 Ee! Yizo maaja zaawe, ngakizi zisimbaha.
Kwokwo, utakolwe kwo wanjandirira.
Imaaja za Nahano, ngakizi zisimbaha
9 Umusore, kuti gwangakizi tuula guli mweru?
Kuli ku njira yoꞌkukizi simbaha Igambo lyawe.
10 Ngweti ngakulooza ku mutima gwani gwoshi.
Aaho! Utakizi ndeka, mbu nyiji hongola imaaja zaawe.
11 Lirya Igambo lyawe, ngoli lisingwiri mu mutima gwani,
gira ndayiji kengeera nakuhubira.
12 E Nahano, ngweti ngakuhuuza.
Aaho! Ukizi nyigiriza imaaja zaawe.
13 Bwo keera watumenyeesa zo,
ngakizi ziyikoomereza-koomereza.
14 Ikyanya ndi mu kulikira imaaja zaawe, ndi mu zishambaalira,
nga kwoꞌmundu angashambaalira ubugale bwage.
15 Yizo maaja zaawe, ngakizi ziyitoneesa kwo,
na ngizi kulikiriza ibyeꞌmwawe.
16 Ee! Ngweti ngakizi zishambaalira.
Ndanâye yibagire Igambo lyawe.
Imaaja za Nahano, ngakizi zishambaalira
17 Ndi mukozi wawe. Kwokwo, ukizi ngirira amiija,
halinde ndonge ukulama, na ngizi simbaha Igambo lyawe.
18 Uyigule amasu gaani, halinde ndonge ukubona,
ngiisi kweꞌmaaja zaawe ziri za kahebuuza.
19 Ndyagagi mubalama naaho mu kihugo.
Aaho! Utambishe imaaja zaawe.
20 Mukuba, umutima gwani, guli mu kizi yidula,
ukumenya ngiisi íbiziri mwo.
21 Ngiisi ábagweti bagayikangaata, uli mu bakanukira.
Bwo batatwaziizi imaaja zaawe, bakoli daasirwi.
22 Haliko niehe, yizo maaja zaawe, nyamiri nzisimbahiri.
Kwokwo, utakizi leka kwo ngayirizibwe, kandi iri mbonyolezibwe.
23 Kundu abatwali bangakuumana, mbu bakizi ngirira igambi libi,
haliko ngakizi yitoneesa hiꞌgulu lyeꞌmaaja zaawe.
Mukuba, ndi mukozi wawe.
24 Yizo maaja zaawe, ziri mu kizi mbanuula,
halinde na ngizi shambaala.
Imaaja za Nahano, ngakizi ziyitoneesa kwo
25 Ngoli lambamiri mu luvu, ngoꞌmundu úkola bu fwa.
Kwokwo, ukizi ndanga niꞌGambo lyawe, ngizi ba mugumaana.
26 Nꞌgakubwira ngiisi kwo njungisiri, wananjuvya.
Kwokwo buno, ukizi nyigiriza imaaja zaawe.
27 Undabaale ukusobanukirwa,
ngiisi kwo ugweti ugakizi kyula.
Haaho, lyo ngakizi yitoneesa hiꞌgulu lyeꞌbitangaaza byawe.
28 Umutima gwani keera gwajengeerwa, na ngoli shengusiri.
Kwokwo, ushubi ngania indege, nga kwo ukandagaania.
29 Ee! Ukizi ndanga, ndakizi lyalyania.
Unakizi ndabaala ukusimbaha amagirizo gaawe.
30 E Nahano, keera nꞌgatoola injira yoꞌkuli,
na ngoli fitiirwi ukukizi simbaha imaaja zaawe.
31 Aaho! Bwo nzifitiirwi kwo,
utandeke mbu ndeezibwe ishoni.
32 Ngavwaruka, gira ngizi kulikira imaaja zaawe.
Mukuba, we mu zinzobanulira.
Imaaja za Nahano, ngwaniini nzisobanukirwe
33 E Nahano, unyigirize imaaja zaawe,
halinde ngizi zikulikiriza halinde ku mbeka.
34 Ee! Ukizi zinzobanulira, lyo ndonga ukuzikulikira.
Na ngizi zisimbaha ku mutima gwani gwoshi.
35 Ukizi ndongoora, halinde ndonge ukuzikulikira.
Kwokwo, lyo ngakizi shambaala.
36 Undabaale, halinde ndonge ukukizi lola ku maaja zaawe.
Si ndakizi hemukira ubugale.
37 Ukizi langa amasu gaani, gatakizi lola ku byoꞌbusha-busha.
Si uleke ngizi ba mugumaana, ku njira yiꞌGambo lyawe.
38 Ndi mukozi wawe. Aahago! Ungirire nga kwo ukandagaania.
Kwokwo, lyaꞌbandu bagakizi kusimbaha.
39 Ikyanya ndi mu teezibwa ishoni, uzindyose mwo.
Mukuba, imaaja zaawe naaho, zo ziri nyiija.
40 Yizo maaja zaawe, ndoziizi bweneene ukuzisimbaha.
Kwokwo, ukizi mbiika mwoꞌbugumaana, mu kati koꞌbwija bwawe.
Imaaja za Nahano, zo mbiisiri kwoꞌmulangaaliro
41 E Nahano, urukundo lwawe, lwo luyamiri ho.
Aahago! Unyereke lwo, mu kungiza, nga kwo ukandagaania.
42 Kwokwo, ikyanya abandu baganduka,
ndonge ubulyo bwoꞌkubashuvya.
Mukuba, ngoli biisiri umulangaaliro kwiꞌGambo lyawe.
43 BwiꞌGambo lyawe liri lyoꞌkuli, leka ngizi lideta.
Ee! Imaaja zaawe, zo mbiisiri kwoꞌmulangaaliro.
44 Imaaja zaawe, nyamiri ndi mu zisimbaha,
halinde ukuhisa imyaka neꞌmyakuula.
45 Nyamiri nzifitiirwi kwo,
gira ndakizi shwekwa mu bindi-bindi.
46 Yizo maaja zaawe, ngakizi zimenyeesa imbere lyaꞌbaami,
buzira kugwatwa neꞌshoni.
47 Zigweti zigakizi njagalusa.
Ee! Nzikuuziri bweneene.
48 Na bwo nzikuuziri, ngakizi zisimbaha.
Nganakizi ziyitoneesa kwo.
Imaaja za Nahano, ndangazibambala
49 E Nahano, si ndi mukozi wawe!
Aaho! Umuhango gwo ukandagaania, ukizi gukengeera.
Ee! Yugwo muhango, gwo guli mu mbiika mwoꞌmulangaaliro.
50 Kiri neꞌkyanya ndi mu libuuka,
gwo guli mu ndanga, ndamirwe na Narufu.
Kwokwo, lyo ndonga ukuholeezibwa.
51 Abanabwikangaate, kundu bagweti baganjekeereza,
haliko ndali mu bambala imaaja zaawe.
52 E Nahano, imaaja zaawe zâli mali gwanwa zabiikwa yaho keera bweneene.
Neꞌkyanya ndi mu zikengeera, ndi mu holeezibwa.
53 Si banangora-mabi boohe, ikyanya bali mu zijanda,
ndi mu ba ndakiiri.
54 Ngiisi ho ndi mu ba njumbisiri nga kinyamahanga,
ndi mu kizi yimba hiꞌgulu lyeꞌmaaja zaawe.
55 E Nahano, kiri na bushigi, ndi mu ba ngukengiiri.
Kwokwo ngakizi simbaha imaaja zaawe.
56 Ee! Nyamiri
ndi mu zisimbaha.
Imaaja za Nahano, zitungiini
57 E Nahano, wehe we mutuli gwani.
Keera nꞌgakulagaania kwo ngakusimbaha.
58 Aaho! Nakuyinginga ku mutima gwani gwoshi, ukizi ngejeerera,
unakizi nyuvwirwa indengeerwa, nga kwo ukandagaania.
59 Nꞌgayitoneesa hiꞌgulu lyoꞌburambe bwani.
Nanabona kwo buli bwija, ndondeere ukukulikira imaaja zaawe.
60 Nanavwaruka, gira ngizi zisimbaha,
ndanatindiriza.
61 Kundu banangora-mabi bangagira mbu banyingize mu byaha,
haliko ndagayibagira amigirizo gaawe.
62 Ndi mu vyuka ubushigi ikati, na ngizi deta kongwa imwawe,
mukuba imaaja zaawe, zitungiini.
63 Ngiisi ábali mu ba bakuyobohiri, bali biira baani.
Ndi mwira wa booshi ábasimbahiri imaaja zaawe.
64 E Nahano, ikihugo kiyijwiri mwoꞌrukundo lwawe.
Ku yukwo, ukizi nyigiriza ngiisi kwo uloziizi.
Imaaja za Nahano, zimbitiiri akamaro ukuhima inooro
65 E Nahano, si nie mukozi wawe.
Aahago! Ungirire amiija, nga kwo ukandagaania.
66 Bwo nyemiiri imaaja zaawe,
unyigirize noꞌbumenyi, kiri noꞌbwitegeereze.
67 Ikyanya utâli zaazi mbana, nâli kizi habuka.
Haliko buno, ngweti ngakulikiriza Igambo lyawe.
68 Uyamiri uli mwija, unali mu gira amiija naaho.
Aaho! Unyigirize ngiisi kwo uloziizi.
69 Kundu abanabwikangaate bagweti bagambeeshera,
haliko, nyamiri nzisimbahiri imaaja zaawe ku mutima gwani gwoshi.
70 Na kundu imitima yabo ikubisirwi, itanali mweꞌndengeerwa,
haliko, niehe ndi mu ba njambaliiri imaaja zaawe naaho.
71 Ikyanya nâli kizi libuuka, lyo nꞌgalonga akamaro.
Mukuba, nꞌgalonga ukukizi yiga imaaja zaawe.
72 Amigirizo gaawe gambitiiri akamaro bweneene,
ukuhima akatundu keꞌnooro, kandi iri keꞌharija.
Imaaja za Nahano, zikwaniini
73 Wenyene ukambumba naꞌmaboko gaawe.
Aaho! Umbeereze ubwitegeereze, halinde ngizi yiga imaaja zaawe.
74 Ngiisi ábakusimbahiri, ikyanya bagambona, bagakizi shambaala.
Mukuba, bagaabona ngiisi kwo mbiisiri umulangaaliro kwiꞌGambo lyawe.
75 E Nahano, nyiji kweꞌmaaja zaawe zikwaniini.
Kwokwo, ikyanya ukambana, lyo ukagira nga kwo byâli ngwaniini.
76 Si ndi mukozi wawe! Kwokwo buno, ugirage ukizi ngunda,
halinde lyo ndonga ukuholeezibwa.
Kwokwo, kwo ukandagaania.
77 Ukizi nyuvwirwa indengeerwa, lyo ndonga ukulama.
Mukuba, amigirizo gaawe, ngakuuziri bweneene.
78 Kundu abanabwikangaate keera bakambalanga,
haliko, niehe ngakizi gira byo uloziizi.
79 Kwokwo, ngiisi ábakusimbahiri, bakizi yija imwani,
lyo balonga ukusobanukirwa neꞌmaaja zaawe.
80 Leka ndonge ukukizi zisimbaha,
halinde lyo ndayiji gwatwa neꞌshoni.
Imaaja za Nahano, ndazindi ziyibagira
81 Umutima gwani guki rindiriiri kwo ugangiza.
Na buno, gukolaga gugahola.
Kundu kwokwo, ngi biisiri umulangaaliro kwiꞌGambo lyawe.
82 E maashi! Amasu gaani, gakoli fwifwitiiri.
Mukuba, ngiisi byo ukandagaania, ndazi bilonga.
Na ngweti ngayibuuza: «Ewe! Ugayiji mboleeza mangoki?»
83 Si ngoli gokanyiiri nga ludaha lwoꞌmuguta, úluli ku kyusi!
Kundu kwokwo, ndazindi yibagira imaaja zaawe.
84 Si nie mukozi wawe. Aahago! Ngagooyera halinde mangoki?
Balya ábagweti bagandibuza, ugabahana kihe kiki?
85 Abanabwikangaate, si bagweti bagambumbira amahya,
batanatwaziizi imaaja zaawe.
86 Kundu kwokwo, imaaja zaawe zooshi zikwaniini ukuyemeerwa.
Aahago! Ugire undabaale. Si abandu bakola mu ndibugiza ubusha!
87 Kundu bâli kola bu nyita,
haliko ndakajanda imaaja zaawe.
88 Kwokwo, undangage na Narufu, ukukulikirana noꞌrukundo lwawe.
Ikyanya imaaja zigalyoka mu kanwa kaawe, ngakizi zisimbaha.
Imaaja za Nahano, zitahiiti ho zihekiiri
89 E Nahano, Igambo lyawe liyamiri liri mwiꞌgulu.
Liganagenderera halinde imyaka neꞌmyakuula.
90 Kiri noꞌbwemeera bwawe,
bugenderiiri halinde mu bibusi byoshi.
Buli ngeꞌkihugo.
Mukuba, ukabumba ikihugo yaho keera, kinakiri ho.
91 Yizo maaja zaawe nazo, ziyamiri ziri ho, halinde zeene.
Ibindu byoshi bikiri ho, hiꞌgulu lyoꞌkukukolera.
92 Amigirizo gaawe, gátaki be gali mu njambaaza,
nga keera amakuba gakanyita.
93 Ndâye yibagire imaaja zaawe.
Mukuba, ku njira yazo, kwo ndi mu longa ubugumaana.
94 Aaho! Ungizagye, maashi! Si ndi weꞌmwawe.
Na ndoziizi ukukizi simbaha imaaja zaawe.
95 Banangora-mabi, kundu bakoli nyitegiiri, gira banyite,
haliko, ngakizi yitoneesa naaho ku maaja zaawe.
96 Ngiisi kindu, kundu kyangaba kitungiini,
haliko, kigweti ho kihekiiri naaho.
Si imaaja zaawe zoohe, zo zitahiiti ho zihekiiri.
Imaaja za Nahano, nzikuuziri bweneene
97 Nguuziri imaaja zaawe bweneene!
Kyo kitumiri ndi mu shiiba ngweti ngaziyitoneesa kwo.
98 Yizo maaja zaawe, ziri mu mbiika mwoꞌbwitegeereze ukuhima abagoma baani.
Ziyamiri zigweti zigandongoora isiku zooshi.
99 Ee ma! Bwo ndi mu kizi yitoneesa ku maaja zaawe,
ndi mwitegeereza ukuhima abigiriza baani booshi.
100 Na bwo nyamiri nzisimbahiri,
ndi mu kizi sobanukirwa ukuhima abagangambale.
101 Ngweti ngakizi yihangirira ku ngiisi mabi,
gira ndonge ukukizi simbaha Igambo lyawe.
102 Ndakajandagira imaaja zaawe.
Mukuba, wehe wenyene we kazinyigiriza.
103 Amagambo gaawe, gali manunu bweneene.
Ganuniri mu kanwa kaani ukuhima ubuuki.
104 Ku njira yeꞌmaaja zaawe, kwo ndi mu longa ubwitegeereze,
halinde lyo ndonga ukushomba ngiisi mabi.
Imaaja za Nahano, liri itara
105 Igambo lyawe liri itara lyoꞌkukizi molekera amagulu gaani.
Ee! Liri mulengeerwe gwoꞌkukizi nyereka ho ngalenga.
106 Imaaja zaawe, ziri zoꞌkuli.
Kwokwo, nꞌgabiika indahiro, kwo ngakizi zisimbaha.
Ee! Irya ndahiro, ndâye gihongole.
107 E Nahano, si ngoli libuusiri bweneene.
Kwokwo, ushubi nvyula, mbe mugumaana, ukukulikirana niꞌGambo lyawe.
108 Ngweti ngakizi kuyivuga. Aaho! Unyakiirage, maashi,
unakizi nyigiriza imaaja zaawe.
109 Kundu nyamiri ho nangasiga itwe lyani,
haliko, ndâye yibagire imaaja zaawe.
110 Na kundu banangora-mabi bakoli nyitegiiri,
haliko, ndakaleka ukuzisimbaha.
111 Imaaja zaawe, buli buhyane bwani bweꞌmyaka neꞌmyakuula.
Umutima gwani guli mu kizi zishambaalira.
112 Keera nꞌgashungika ku mutima gwani gwoshi,
kwo ngakizi zikulikira, halinde imyaka neꞌmyakuula.
Imaaja za Nahano, ngweti ngazilola kwo
113 Ngiisi balyalya, mbashombiri bweneene.
Haliko imaaja zaawe, nzikuuziri.
114 Keera nabiika umulangaaliro kwiꞌGambo lyawe.
We kabisho kaani, unali we siribo yani.
115 E banangora-mabi, mundyokage ha butambi,
gira ndonge ukukizi simbaha imaaja za Rurema wani.
116 E Rurema, ukukulikirana noꞌmuhango gwawe,
ukizi nzikamya, halinde ndonge ukulama.
Keera nakubiika kwoꞌmulangaaliro.
Aaho! Utayemeere kwo ndeezibwe ishoni.
117 Nyamiri ngweti ngaalola ku maaja zaawe.
Aahago! Ukizi nzikamya, halinde ngizibwe.
118 Ngiisi ábali mu bambala imaaja zaawe, uli mu yami batwa.
Si yabo bandu, bayitebereziizi naaho!
119 Si balya banangora-mabi booshi, ugweti ugabakabulira ngiꞌjolera.
Haliko niehe, nguuziri imaaja zaawe.
120 Amagala gaani, gali mu juguma hiꞌgulu lyawe.
Ikyanya uli mu kizi twa imaaja, ndi mu ba nzisimbahiri.
Ndonge ukukizi sobanukirwa neꞌMaaja za Nahano
121 Ngweti ngakizi gira íbikwaniini, binali byoꞌkuli.
Aahago! Utandekeerere mu maboko gaꞌbagoma.
122 Si ndi mukozi wawe. Aaho! Ukizi ngashaanira.
Utanaleke kwo abanabwihemye bakizi ndibuza.
123 Keera wandagaania kwo ugangiza.
Kundu kwokwo, ngi gweti ngakulindirira.
Amasu gaani, ganakoli luhiri.
124 Bwo ndi mukozi wawe, ukizi nyereka urukundo lwawe,
unakizi nyigiriza ngiisi byo uloziizi.
125 Ee maashi! Ndi mukozi wawe.
Aahago! Umbeereze ubwitegeereze,
lyo ndonga ukukizi sobanukirwa neꞌmaaja zaawe.
126 E Nahano, kyekino kyanya, kyo wangakoziri kwo.
Si abandu keera bakahongola amigirizo gaawe.
127 Haliko niehe, ngakuuziri ukuhima inooro,
kiri neꞌnooro muguuhya.
128 Ndi mu haruura imaaja zaawe kwo zikwaniini.
Haliko ngiisi íbitakwaniini, byohe mbishombiri.
Imaaja za Nahano, ziri za kahebuuza
129 Imaaja zaawe, ziri za kahebuuza.
Kyo kitumiri nyamiri nzisimbahiri.
130 Amagambo gaawe, ikyanya gagweti gaganyigiriza, gali mu leeta umulengeerwe,
halinde kiri naꞌbahwija, bali mu longa ukusobanukirwa.
131 Ndi mu yidula bweneene imaaja zaawe.
Kyo kitumiri ngweti ngayashuula akanwa.
132 Aahago! Ungebagane, maashi, unanyuvwirwe indengeerwa,
nga kwo uyamiri uli mu girira ngiisi ábakuuziri iziina lyawe.
133 Ukizi rongoora ishando zaani, nga kwo ukandagaania.
Utanaleke kweꞌbyaha bikizi ngoleesa.
134 Ikyanya abandu bali mu ndibuza, ungize,
gira lyo ndonga ukukizi simbaha imaaja zaawe.
135 Si ndi mukozi wawe. Aaho! Ukizi ngirira bwija.*119.135 Muharuuro 6.25.
Ukizi nyigiriza imaaja zaawe.
136 Si abandu batali mu simbaha imaaja zaawe!
Kyo kitumiri imigenge igweti iganvukumuka mu masu nga migezi.
Imaaja za Nahano, ziri zoꞌkuli
137 E Nahano, we mwene ukuli.
Neꞌmaaja zaawe, zikwaniini.
138 Imaaja zo ukabiika, ziri zoꞌkuli,
zinakwaniini ukuyemeerwa lwoshi-lwoshi.
139 Umwete gwo mbiiti hiꞌgulu lyawe, gukola mu nduhya.
Mukuba, abagoma baani, batatwaziizi amagambo gaawe.
140 Imihango yawe, keera twagigeza, yanasikama.
Kyo kitumiri ngikuuziri bweneene.
141 Kundu ndi mugunda naaho, na ngweti ngagayirizibwa,
haliko, ndayibagiiri imaaja zaawe.
142 Ubwija bwawe bugenderiiri, halinde imyaka neꞌmyakuula.
Neꞌmaaja zaawe ziri zoꞌkuli.
143 Kundu nâli kizi libuuka, nanalongaga noꞌmwizingeerwe,
haliko, imaaja zaawe zikiri mu njambaaza.
144 Ee! Yizo maaja zaawe ziyamiri ziri zoꞌkuli,
halinde imyaka neꞌmyakuula.
Kwokwo, ukizi zinzobanulira, lyo ndonga ukulama.
Kutakira Nahano
145 E Nahano, ngweti ngakutabaaza ku mutima gwani gwoshi.
Aaho! Unjuvye, halinde lyo ngizi simbaha imaaja zaawe.
146 Ngweti ngakizi kutakira kwo ungize,
lyo ngizi longa ukusimbaha imaaja zaawe.
147 Ndi mu kizi vyuka ku mutwezi, gira ngutabaaze.
Igambo lyawe, lyo mbiisiri kwoꞌmulangaaliro.
148 Na ndi mu laala mbwini,
gira ndonge ukukizi yitoneesa ku mihango yawe.
149 E Nahano woꞌrukundo, ukizi ndanga na Narufu,
ukukulikirana neꞌmaaja zaawe.
Ukizi yuvwa izu lyani.
150 Si banangora-mabi baloziizi ukundeera,
batanali mu twaza imaaja zaawe, kiri neꞌhiniini.
151 Kundu kwokwo, uyamiri unyegiiri.
Neꞌmaaja zaawe zooshi, ziri zoꞌkuli.
152 Yaho keera, nꞌgayiga
kweꞌmaaja zaawe ziyamiri ho imyaka neꞌmyakuula.
Ukutabaaza
153 E Nahano, ndazi yibagira imaaja zaawe.
Aaho! Ulolage ngiisi kwo bagweti bagandibuza, unangize.
154 Ukizi mbulanira, unangize.
Ulekage ngizi lama, nga kwo ukandagaania.
155 Si banangora-mabi batali mu twaza imaaja zaawe.
Kyo kitumiri boohe, batâye kizibwe.
156 E Nahano, indengeerwa zaawe, ziri mbamu bweneene.
Uli mu leka ngizi lama, ukukulikirana neꞌmaaja zaawe.
157 Kundu abagoma balyagagi bingi, banagweti bagandibuza,
haliko, ndajandagiiri imaaja zaawe.
158 Ikyanya ndi mu bonaga abahuni, ndi mu bashomba bweneene.
Mukuba, batasimbahiri Igambo lyawe.
159 E Nahano, lolaga ngiisi kwo nzimbahiri imaaja zaawe.
Aaho! Ukizi ndeka mbe mugumaana, ukukulikirana noꞌrukundo lwawe.
160 Amagambo gaawe gooshi, gali goꞌkuli.
Imaaja zaawe, kwo zikwaniini, zigayama ho imyaka neꞌmyakuula.
161 Abatwali bagweti bagandibugiza ubusha.
Kundu kwokwo, umutima gwani gugapuupa naaho hiꞌgulu liꞌGambo lyawe.
162 Imihango yawe iri mu njambaaza bweneene.
Ndi nga mundu úwalonga ikindu kyeꞌkishingo kihamu.
163 Ikyanya abandu bagweti bagabeesha,
ndi mu banenuuka, na mbe mbashombiri bweneene.
Haliko, imaaja zaawe, zoohe, nzikuuziri.
164 Ngiisi lusiku, ndi mu kizi kuhuuza ubugira kalinda.
Mukuba, imaaja zaawe ziri zoꞌkuli.
165 Yizo maaja zaawe, ngiisi ábazikuuziri,
bali mu longa umutuula nirizina.
Ndaanakyo kindu íkyangabasiitaza.
166 E Nahano, ngweti ngakulindirira, gira uyiji ngiza.
Kyo kitumiri ngulikiiri imaaja zaawe.
167 Nzikuuziri bweneene.
Kyo kitumiri ngweti ngazisimbaha.
168 Ee! Nzisimbahiri bweneene, kuguma neꞌmihango yawe.
Mukuba, ngiisi byo ngweti ngaagira, ubiyiji-yiji.
Kuhuuna ubutabaazi
169 E Nahano, ukizi yuvwa amalira gaani.
Ndonge ukusobanukirwa ku njira yiꞌGambo lyawe.
170 Undegage amatwiri.
Unangize, ukukulikirana na kwo ukandagaania.
171 Leka ndonge ukukizi kuyivuga.
Mukuba, keera ukanyigiriza imaaja zaawe.
172 Ngiisi byo uli mu tegeka, biri byoꞌkuli.
Kwokwo, ngakizi yimba hiꞌgulu lyeꞌmihango yawe.
173 Si keera nꞌgatoola ukukulikira imaaja zaawe.
Aaho! Ukizi ndabaala.
174 E Nahano, mu maaja zaawe, mwo ndi mu kizi shambaalira.
Aahago! Ngoli rindiriiri bweneene kwo ungize.
175 Undeke nilame, lyo ndonga ukukizi kuhuuza.
Imaaja zaawe, zilonge ukunzikamya.
176 Buno, ngola mu jeba-jeba, nga kibuzi íkikateereka.
Kundu kwokwo, ndi mukozi wawe. Aaho! Uyiji njakula.
Mukuba, imaaja zaawe, ndaziyibagiiri.