127
Amiija gooshi gali mu lyoka imwa Nahano
1 Ulwimbo lwa Sulumaani. Luli mu yimbwa na ábali mu zamuukira i Yerusaleemu.
Nahano, iri angaba atali ye mu yubaka inyumba,
abuubasi bagaaba bayiluhiza ubusha.
Nahano, iri angaba atali ye mu langa akaaya,
abalaliizi baako bagaaba balaliiri ubusha.
2 Abandu, kundu bangazindukiri vyuka kare-kare,
banagwejere makeereza mbu lyo bakolera byo bagaalya,
bali mu yiluhiza ubusha.
Mukuba ngiisi bo Nahano akuuziri, ali mu baheereza byo banaki gwejiiri.
3 Bagala biitu, bulyagagi buhyane ukulyoka imwa Nahano.
Yenyene ye mu tuheereza abaana, bibe bihembo.
4 Umundu, iri angabuta abaana boꞌbutabana mu busore bwage,
bali mu ba nga myambi mu maboko geꞌndwani.
5 Ee! Ahiriirwi, ngiisi yoꞌludaha lwage lugiyijwiri mwo.
Uyo mundu, ikyanya âye buulane naꞌbagoma baage kwiꞌrembo lyaꞌkaaya,
atâye kakazibwe.