126
Amalira gagaki hinduka bushambaale
Luli mu yimbwa na ábali mu zamuukira i Yerusaleemu.
Ikyanya twâli ki shwesirwi mu mbohe i mahanga,
Nahano anashubi tugalulira i Sayuni.
Twâli riiri nga tukola mu loota ibirooto.
Twâli gweti tugasheka bweneene,
iri tunayimba ku bushambaale.
Yikyo kyanya, ibinyamahanga byanakizi deta kwokuno:
«E balya, Nahano keera akabayereka amagambo gaꞌkahebuuza bweneene.»
Ee! Galya magambo gâli riiri gaꞌkahebuuza,
tunakoli shambiiri bweneene.
 
E Nahano, ngiisi kwo ukatugashaanira ubwa mbere,
kube kwo ugakizi tugashaanira kandi.
Tukizi ba ngiꞌshamba lyeꞌNegebu,
ikyanya inyiiji ziri mu shubi hinga mwo.
 
Ngiisi ábagweti bagabyala ku migenge,
bagaki yimbula, iri banabanda akabuuli.
Ee! Ikyanya bali mu gendi byala imbuto, kundu bakiri mu lira-lira,
haliko, bagaki galuka babetwiri imimbu, iri banayimba ku bushambaale.