139
Nahano ayiji-yiji byoshi
1 Izaburi ya Dahudi, imwoꞌmwimangizi waꞌbimbi.
E Nahano, keera ukangahiriza,
unakoli nyiji lwoshi.
2 Uyiji ikyanya ndi mu bwatala,
neꞌkyanya ndi mu yimuka.
Na kundu nangagendi beera hala,
uli mu ba uyiji ngiisi kwo nzaliiri.
3 Ikyanya ndi mu genda, uli mu ba umbwini-mbwini,
kiri neꞌkyanya ndi mu luhuuka ha kaaya.
Ngiisi byo ndi mu gira, ubiyiji-yiji byoshi.
4 E Nahano, kiri neꞌkyanya ndazi deta igambo,
uli mu gwanwa ukoli liyiji.
5 Uli mu ba unzokaniini imbande zooshi,
unambiisiri kwoꞌkuboko kwawe.
6 Yibyo byoshi, biri bya kahebuuza.
Ndanganabisobanukirwa.
7 Aaho! Hayi ho nangagenda, gira nzige Umutima gwawe hala,
na hayi ho ndangakugwana?
8 Kundu nangazamuukiiri mwiꞌgulu,
kandi iri ngendi gwejera i kuzimu,
yaho hooshi, ngagwana uli ho.
9 Na kundu nangabalala, na mbike imunda izuuba liri mu huluka,
halinde na nyinywerereke i kajabo keꞌnyaaja,
10 kiri neꞌyo munda, ugaaba ukiri mu ndongoora.
Ukuboko kwawe kweꞌlulyo, kuganzikamya yo.
11 Hali ikyanya nangahuuna kwoꞌmulengeerwe úgunzokaniini
guhinduke kihulu, kinambishe.
12 Kundu kwokwo, imwawe, yikyo kihulu kigaaba nga ndaakyo.
Ubushigi bugatanguula imbere lyawe ngiꞌzuuba.
Mukuba, imwawe, ikihulu noꞌmulengeerwe, byo biguma.
13 Ikyanya ukandema mu nda ya maawe,
lyo ukalema neꞌbirumbu byani byoshi.
14 Kyo kitumiri ngakuyivuga bweneene.
Mukuba, yukwo kubumbwa kwani, kukaba ku njira yeꞌkitangaaza.
Ee! Ngiisi kwo uli mu kola, kuli kwaꞌkahebuuza.
Yibyo byoshi, ngoli biyiji bwija.
15-16 Kundu nꞌgalemerwa áhabishamiri,
haliko, amavuha gaani gatâli bishamiri imwawe.
Ikyanya nꞌgalemwa, nâli tuuziri nga mu kuzimu,
naꞌmagala gaani gâli ki riiri kundi-kundi.
Kundu kwokwo, wâli mbwini.
Isiku zo ukanjungikira, zooshi zâli kola nyandike mu kitaabo kyawe.
Ee! Zikayandikwa mwo, kiri na ku kyanya ndâli zaazi ba ho.
17 E Rurema, inzaliro zaawe, ziri mu nzimiisa bweneene.
Ikyanya ziri mu kumanibwa kuguma, ziri mu ba kanyegete.
18 Kundu nangagiziri mbu nziharuure,
haliko zangaluguusiri bweneene ukuhima umushenyu kwiꞌbuga.
Ikyanya ndi mu vyuka,
ndi mu gwana tuki ririinwi.
19 E Rurema, we kongwa, bwangabiiri bwija uminikage banangora-mabi.
Mwe biitani, munjaage ha butambi.
20 E Rurema, abagoma baawe bagweti bagakutuka,
banali mu koleesa iziina lyawe ku njira ítali nga yo.
21 E Nahano, ngiisi ábakushombiri, naani mbashombiri.
Si bagweti bagakizi huna imbere lyawe!
22 Ee! Yabo bandu babi, mbashombiri ngana-ngana,
na ndi mu baharuura kwo bali bagoma baani.
23 E Rurema, ungahirize, halinde umenye íbindi mu mutima.
Ungezagye, umenye ngiisi kweꞌnzaliro zaani zikoli hanamiri.
24 Mu kati kaani, iri mwangaba muli íbyangakuyagaza, ubinyereke.
Undongoore mu njira ígambisa mu bulamu bweꞌmyaka neꞌmyakuula.