140
E Nahano, ungize mu banangora-mabi
1 Izaburi ya Dahudi, imwoꞌmwimangizi waꞌbimbi.
2 E Nahano, ungize mu banangora-mabi.
Si bagweti bagakomeresania! Aaho! Ukizi ndanga, maashi!
3 Yabo banangora-mabi, ngiisi lusiku bali mu shungika amabi,
banali mu kizi vyula izibo.
4 Indimi zaabo, ziri mu komana, nga mijoka.
Ikyanya bali mu deta, bali mu yitana,
nga manjoka-njoka geꞌbihoma.*140.4 Barumi 3.13.
5 E Nahano, balya banangora-mabi, si balyagagi noꞌbushobozi!
Aaho! Ukizi ndanga, ndatibukire mu maboko gaabo.
Bwo bali mu komeresania, ukizi ndangaga, maashi!
Si bakoli shungisiri ukundeedeka haashi!
6 Abanabwikangaate bakoli ndeziri umubashu.
Keera bayajuula umugozi mu njira, noꞌmukwabu, gira bangwase.
7 Ngweti ngabwira Nahano: «Wehe, we Rurema wani.»
Aaho! Ikyanya ndi mu kuyinginga,
ukizi ndega amatwiri, maashi!
8 Si uli woꞌbushobozi bwoshi, we nali mu ngiza.
Kiri na ku lusiku lwiꞌzibo, we mu njuutira.
9 Aahago! Utaleke kwo banangora-mabi bagire nga kwo baloziizi.
Kiri neꞌshungi zaabo mbi, ukizi ziyita.
Buzira kwokwo, hali ikyanya bangayiji yikangaata.
10 E Nahano, kundu abagoma bakoli nzokaniini,
banagweti bagaagira igambi libi hiꞌgulu lyani,
haliko, ubagwatiise mu magambo gaabo boonyene.
11 Uyonere ibengesheeshe lyoꞌmuliro ku matwe gaabo,
banakabulwe mu birimbi-rimbi byoꞌmuliro.
Iyo munda, batâye longe ubulyo bwoꞌkuyilyosa yo.
12 Ngiisi ábali mu beesha,
utabaleke kwo bakizi genduukirwa mu kihugo.
Kiri naꞌbiitani, bakizi shereezibwa.
13 Haliko, abakeni boohe, Nahano ayamiri ali mu bakiza.
Ee ma! Ali mu baheereza íbibakwaniini.
14 Ngiisi ábakwaniini, ku kasiisa bagakizi huuza iziina lya Nahano.
Banabe batuuziri imbere lyage.