141
E Nahano, ukizi ndanga naꞌkanwa
1 Izaburi ya Dahudi.
E Nahano, ngweti ngakuhamagala.
Aaho! Uvwaruke, we kongwa, uyiji ndabaala.
Ikyanya ndi mu kutabaaza, ukizi yuvwiriza izu lyani.
2 Yaga mahuuno gaani, ukizi gayuvwa nga mubadu úguli mu tuuma ikyusi imbere lyawe.
Ikyanya ndi mu lengeza amaboko gaani mu kukuhuuna,
kukizi ba ngiꞌtuulo lyaꞌkabigingwe.
3 E Nahano, ukizi langa akanwa kaani.
Unakizi kashweka, ndayiji kengeera nadeta buligo.
4 Ukizi langa noꞌmutima gwani, gutahemukire amabi.
Utalekage kwo ngizi yibiika ku bali mu kizi gira ibihigo.
Na kundu ibyokulya byabo byangaba biheshiri ngana,
haliko, utaleke mbu ngizi birya kwo.
5 Bwangaba bwija, umundu woꞌkuli anganukire.
Kiri noꞌkuhimbula, angambimbula.
Ikyanya agiraga kwokwo, iri angira bwija.
Kwangabiiri nga mavuta go anyonera mwiꞌtwe.
Ee! Itwe lyani, litangalahira.
Ngakizi huuna Rurema,
kwo ahangirire banangora-mabi ku mabi gaabo.
6 Banahamwabo, ikyanya baganyanyagwa ku nyaala,
lyo bagayemeera kwaꞌmagambo gaani gali goꞌkuli.
7 Bagaadeta: «Nga kwaꞌmabuye gali mu zuulwa neꞌfuka,
kwo naꞌmavuha giitu keera gakashaabulwa hiꞌheero.»
8 E Nahano woꞌbushobozi bwoshi,
wehe, we mbiisiri kwoꞌmulangaaliro.
We na ngweti ngatibitira.
Kwokwo, utandekere ho nangasiga itwe lyani.
9 Yabo bandu, si balyagagi banangora-mabi!
Aahago! Ikyanya bali mu ba bandeziri imitego, ukizi ndanga.
10 Iyo mitego yabo, bagiyiduudike mwo boonyene.
Haliko niehe, ndonge ukukizi gibambala.