143
E Nahano, undabaale
1 Izaburi ya Dahudi.
E Nahano, uli mwemeera, unali mu gira ibyoꞌkuli.
Aaho! Ukizi yuvwa amahuuno gaani.
Unyuvwirwe indengeerwa, unandege ukutwiri.
2 Si ndyagagi mukozi wawe!
Aahago! Utandwire ulubaaja kwo mbanwe.
Si mu booshi ábali ho,
ndaaye kiri noꞌmuguma úkwaniini imbere lyawe!
3 Abagoma baani bakola mu ndambiriza,
keera bakanandimba haashi.
Bananyimula, mbu ngendi tuula mu kihulu,
kuguma naꞌbandi keera ábakafwa kare.
4 Kyo kitumiri umutima gwani gukoli shengusiri.
Keera nanayihebuura.
5 Ngi kengiiri zirya siku za keera.
Na ngweti ngayitoneesa ku byoshi byo wâli kizi gira.
6 Kwokwo, ndi mu tega amaboko gaani imbere lyawe.
Umutima gwani gukoli nyotiirwi,
ngiꞌdaho íryabula amiiji.
7 E Nahano, uvwarukage, unjuvye, maashi!
Si ngolagi yihebwiri!
Aahago! Utambindulire ingoto.
Mukuba, iri wangagimbindulira, lyo ngayami fwa.
8 Keera nakubiika kwoꞌmulangaaliro.
Aaho! Ukizi nyereka urukundo lwawe ngiisi shesheezi.
Amahuuno gaani, keera gahika imwawe.
Kwokwo, ukizi nyereka ngiisi ho ngalenga.
9 E Nahano, we ndi mu tibitira.
Kwokwo, ukizi ngiza mu bagoma baani.
10 Ngiisi byo uloziizi, ubinyigirize.
Mukuba, we Rurema wani.
Noꞌmutima gwawe, gulyagagi mwija.
Aaho! Ukizi ndongoora haꞌmagulu gangasikama.
11 E Nahano, ungize halinde iziina lyawe likizi huuzibwa.
Ugire íbikwaniini, mu kundyosa mu malibu.
12 Bwo unguuziri, utwikirize abagoma baani.
Ndyagagi mukozi wawe. Aaho! Ugire ubaminike booshi.