144
Bahiriirwi, abandu bo Rurema agashaniiri
1 Izaburi ya Dahudi.
Tukizi yivuga Nahano! Mukuba, ye lwala lwani.
Ye mu ngomeereza ukugira izibo,
halinde nimenye ngiisi kwo nangalwa.
2 Rurema anguuziri, ye na gweti úgandanga.
Ye tumiri ndi kikalage, ye nali mu ngiza.
Ye siribo yani. Na ndi mu kizi tibitira imwage.
Ali mu hima ibinyamahanga, anababiike mwiꞌdako lyani.
3 E Nahano, kituma kiki uli mu hahalira abandu?
Balyagagi nga banyandi, halinde ukizi bayisaliza kwo?
4 Si abandu balyagagi nga muuka naaho!
Isiku zaabo ziri mu lenga duba, nga kimbehwa.
5 E Nahano, uyise igulu, unamanuke mu kihugo.
Uhume ku migazi, gira ikizi tuuma kweꞌkyusi.
6 Ulavize mweꞌmilavyo, halinde ishaabule abagoma.
Ubashunguuse mweꞌmyambi, gira batibite.
7 Bwo utuuziri mwiꞌgulu, ugolole ukuboko kwawe,
unandyose mu maboko geꞌbinyamahanga.
Si baloziizi ukummiragusa, ngiꞌbenga lyaꞌmiiji!
8 Bagweti bagaadeta naaho amagambo geꞌbibeesha,
banali mu kizi teberezania.
9 E Rurema, ngakizi kuyimbira ulwimbo luhyahya.
Na ngizi kulakiza ululanga lweꞌmirya ikumi.
10 Mukuba, we mu tuma abaami bagaahima,
unali mu kiza umukozi wawe Dahudi, atayitwe neꞌngooti.
11 Ungizagye, unanguluule mu maboko geꞌbinyamahanga.
Si bagweti bagadetera ibibeesha,
banali mu kizi teberezania!
12 Abatabana biitu, ikyanya bakiri misore,
bagaakula bwija, nga mbuto íziri mu ndalo.
Abanyere biitu, bagakizi limbiisibwa,
nga nguliro mu kajumiro.
13 Ibihinda biitu, bigakizi yijula mwo ngiisi mulala gweꞌmbuto.
Ibibuzi biitu mu ndagiriro, bigayolola ibihumbi,
kiri neꞌbihumbi ikumi.
14 Ingaavu ziitu, zigakizi ba zishishiri, zinafiike.
Inzitiro ziitu, zitâye tulwe.
Naꞌbandu biitu, batâye gendi shwekerwa i mahanga.
Mu kaaya kiitu, mutâye be ikimombo hiꞌgulu lyaꞌmalibu.
15 Bahiriirwi, ngiisi bo Rurema agashaniiri kwokwo.
Banahiriirwi, ngiisi bo Rurema ali Nahamwabo.