145
Ngiisi byo Rurema akabumba, bigakizi múyivuga
1 Izaburi ya Dahudi.
E Rurema, ngakizi kuhuuza, bwo we mwami wani.
Ngakizi huuza iziina lyawe, halinde imyaka neꞌmyakuula.
2 Ee! Ngakizi kuhuuza ngiisi lusiku.
Ngakizi huuza iziina lyawe, halinde imyaka neꞌmyakuula.
3 Nahano ye sumbiragi booshi,
ye na kwaniini ukukizi yivugwa bweneene.
Ndaaye úwangasobanukirwa noꞌbukulu bwage.
4 E Nahano, abandu bagakizi bwira abaana baabo
ngiisi kwo wâli kizi gira ku bukalage.
5 Banamenyeesanie ngiisi kwo uli mu gingikwa mu kati koꞌbulangashane.
Kiri na naani, ngakizi yitoneesa ku kitangaaza byawe.
6 Ee! Abandu bagakizi menyeesa ngiisi kwo uli mu gira ibya kahebuuza.
Na naani, ngakizi menyeesa ngiisi kwo ulyagagi mukulu.
7 Ikyanya bagakizi kengeera ubwija bwawe, bagakizi bushagakulira,
banakizi yimba ku bushambaale, bwo uli mu gira íbikwaniini.
8 Nahano ali mu yuvwiranwa indengeerwa, anali mu kejererana.
Ee! Ayijwiri mwoꞌrukundo, atanali mu yagalwa duba.
9 Ali mu gashaanira abandu booshi,
anali mu kejeerera ibiremwa byage byoshi.
10 E Nahano, ngiisi byo ukabumba, bigakizi kuyivuga.
Naꞌbandu baawe kwakundi, bagakizi kuhuuza.
11 Bagamenyeesa ngiisi kwo uli mu gingikwa mu bwami bwawe,
na ngiisi kwo uli munabushobozi.
12 Kwokwo, lyaꞌbandu booshi bagaamenya ibitangaaza byawe bya kahebuuza,
na ngiisi kwo ugingisirwi mu bwami bwawe.
13 Ee! Ubwami bwawe buyamiri ho imyaka neꞌmyakuula.
Ubutwali bwawe bugagenderera mu bibusi byoshi-byoshi.
Aahago! Ikyanya Rurema ali mu tulagaania imihango,
ali mu ba mwemeera mu kugikwiza.
Mukuba, akuuziri ngiisi byo akabumba.
14 Ikyanya abandu bali mu gwa, Nahano ali mu bavyula.
Neꞌkyanya bali mu vindagazibwa, ali mu bayinamula.
15 E Nahano, ibiremwa byoshi, biri mu kulola kwo.
Mukuba, uli mu biheereza ibyokulya ku kyanya íkikwaniini.
16 Ee! Uli mu kizi golola ukuboko kwawe,
unabiheereze ngiisi íbibigooziri.
17 Nahano ali mu gira íbikwaniini mu kati ka byoshi,
anali mu ba akuuziri byoshi byo akabumba.
18 Ikyanya abandu bali mu mútabaaza, ali mu babeera hoofi.
Mukuba, bali mu mútabaaza mu kati koꞌkuli.
19 Ngiisi ábali mu ba basimbahiri Nahano,
ali mu bashuvya ku magoorwa gaabo.
Neꞌkyanya bali mu mútabaaza mu kati kaꞌmalira,
ali mu bayuvwa, anabakize.
20 Ee! Ikyanya abandu bali mu ba bakuuziri Nahano,
ali mu kizi balanga.
Si banangora-mabi boohe, agabaminika ngana!
21 Ngakizi yivuga Nahano.
Ibiremwa byoshi bikizi huuza iziina lyage, kwo liri lyeru,
halinde imyaka neꞌmyakuula.