148
Ibiremwa byoshi bikizi huuza iziina lya Nahano
1 Tukizi huuza Nahano!
Mukizi huuza Nahano, mwe muli mwiꞌgulu.
Mukizi múhuugiza yaho áhali hiꞌgulu bweneene.
2 Mukizi múhuuza, mwe baganda baage,
kwo muli binoono iyo munda.
3 Izuuba noꞌmwezi, niinyu mukizi múhuuza.
Kiri neꞌndonde, kwo ziyasiri, nazo zikizi múhuuza.
4 Mukizi múhuuza, mwe muli hiꞌgulu lya byoshi.
Na niinyu, mwe miiji ágali kwiꞌgulu! Mukizi múhuuza.
5 Yibyo byoshi bikizi huuza iziina lya Nahano.
Mukuba, akakyula, byanayami ba ho.
6 Ngiisi kiguma kyabyo, akakibiika ho kigabeera imyaka neꞌmyakuula.
Kwokwo kwo akakyula, bitanâye here.
7 Mweshi mwe muli mu kihugo, mukizi huuza Nahano.
Mukizi múhuuza mwe tulingi tweꞌnyaaja,
kuguma na babitaatalwe beꞌfwi ábamùli mwo.
8 Mukizi múhuuza na niinyu mwe milavyo, neꞌndara,
noꞌlugungu, noꞌluuta, neꞌbihuhuuta.
Mukuba, mweshi muli mu kizi gira nga ngiisi kwo adesiri.
9 Mukizi múhuuza na niinyu mwe migazi, noꞌtugangazi twoshi,
neꞌbiti íbiri mu tongeka, kuguma neꞌbiti byoshi bya mu kishuka.
10 Mukizi múhuuza na niinyu mwe nyamiishwa, neꞌbitugwa byoshi,
kuguma neꞌbiremwa biniini, noꞌtunyuni.
11 Mukizi múhuuza na niinyu mwe baami beꞌkihugo,
naꞌbandi batwali booshi ábakiri mwo, naꞌbaluzi, kiri neꞌbinyamahanga byoshi.
12 Mukizi múhuuza na niinyu mweꞌmisore mitabana,
kuguma neꞌminyere.
Mukizi múhuuza mwe bakoli bwini, kiri naꞌbaana.
13 Yabo booshi bakizi huuza iziina lya Nahano.
Mukuba, iziina lyage naaho, lyo liri mu kuzibwa hiꞌgulu lya byoshi.
Ubulangashane bwage buhimiri byoshi bya mu kihugo,
kiri neꞌbya mwiꞌgulu.
14 Abahisiraheeri bo bali bataluule baage, anabakuuziri.
Kyo kitumiri ali mu basikamya,
halinde booshi banakizi múyivuga.
Tukizi huuza Nahano!