149
Mukizi yimbira Nahano ulwimbo luhyahya
Tukizi huuza Nahano!
 
Mukizi yimbira Nahano ulwimbo luhyahya.
Mukizi múhuuza mu muhumaanano gwaꞌbandu baage.
E Bahisiraheeri, keera akamùbumba.
Kwokwo, mukizi múshambaalira.
Abandu beꞌSayuni, bakizi shagalukira umwami wabo.
Mukizi yivuga iziina lyage mu kukizi likinira.
Mukizi lihuuza mu kulasa ingoma, kiri neꞌnzeeze.
 
Nahano asiimiri abandu baage.
Ngiisi ábali batuudu, ali mu bakiza, anabagingike.
Kwokwo, abandu baage bakizi shambaala mu kumúgingika.
Kiri neꞌkyanya bali ku ngingo zaabo,
bakizi múyimbira ku bushambaale.
 
Bakizi yivuga Rurema noꞌtunwa twabo.
Banabe bafumbiiti ingooti zaꞌmuugi gabiri,
gira bakizi yihoola ibinyamahanga,
mu kubahaniiriza.
Bakoneereze abaami baabo neꞌminyororo,
banashweke naꞌbatwali baabo noꞌtubangira.
Kwokwo, lyo bagaahana ibinyamahanga,
nga kwo Rurema akayandika.
Kwokwo, kwaꞌbandu baage bagakizi longa ubulangashane.
 
Tukizi huuza Nahano!