3
Umunyere aloota kwo agenda agashakula umukundwa
Umunyere
1 «Mu bushigi, ikyanya nâli gwejiiragi ku ngingo,
nanakizi looza umukundwa wani.
Na kundu nꞌgamúlooza ngana-ngana, atanaboneka.
2 Kwokwo, nanavyukaga, gira ngende ngamúlooza.
Nꞌgazunguluka mu kaaya kooshi, shoobe!
Nanakizi lenga mu mitalimbwa, kiri na haꞌbandu bali mu kuumana.
Kundu nꞌgamúlooza hooshi, ndanamúbona.
3 Iri hakatama, nanahulukira ku balaliizi baꞌkaaya,
bagweti bagazunguluka.
Nanababuuza: “Ka keera mwambonera ulya mukundwa wani?”
4 Lyeryo, mbu tuhinjusanie,
ulya mukundwa wani, nanayami múbona.
Nanayami múzezeera, ndanaki shubi múliika kwo agende.
Nanamútwala mu nyumba ya maawe,
nanayami mútyombeeza mu kisiika kyage,
munali mwo akaheekera inda yani.
5 «E banyere beꞌYerusaleemu,
namùyinginga maashi, kwiꞌziina lyeꞌnzobe, neꞌlyaꞌkasa,
mutakolwe mbu muyivyule mwoꞌlulungumizi,
neꞌkihe kyalwo kitazi hika!»
6 «Aaho! Nyandagi uliira úgweti úgatunduuka mwiꞌshamba nga kyusi?
Si agweti agahulusa umuhongolo mwija gweꞌmanemane,
na gwoꞌmubadu, na gwaꞌgandi malaasi!
7 «Lolagi! Ikitumbi kya mwami Sulumaani, kiriira!
Kizungulusirwi naꞌbalaazi makumi galindatu.
Booshi, bali bikalage byeꞌndwani zaꞌBahisiraheeri.
8 Yabo booshi, bayiji ukulwisa ingooti.
Ngiisi muguma wabo, ali ndwani,
anakenyiiri ingooti yage mu kibuno,
gira alonge ukuhagana noꞌmugoma bushigi.
9 Mwami Sulumaani, ikitumbi kyo bagweti bagamúlengereza kwo,
akakilingaania mu mbahwa nyiija zeꞌLebanooni.
10 Ibigingi byakyo, bikatulwa mu harija.
Ha bushendamiro, hakabugwa inooro.
Na ha bubwataliro, hakabwikirwa neꞌbitambaala byeꞌkituku-tuku.
Abanyere beꞌYerusaleemu, bo bakahalimbiisa mu kati koꞌrukundo.»
Umunyere
11 «E banyere beꞌSayuni, muhuluke, muyiji bona mwami Sulumaani.
Uyo mwami ayambiiti lulya lushembe lwo akayambikwa na nyina.
Ee! Akaluyambikwa ulusiku lwoꞌbuhya.
Lulya lusiku, umutima gwage gwâli gweti gugashambaala ngana-ngana!»