4
Umushosi
1 «E mukundwa wani, unonosiri ngana-ngana.
Amalanga gaawe gabuyahiri bweneene.
Amasu gaawe, bwo gasiisirwi mu lushungi lwawe,
gashushiri ngaꞌmasu geꞌngunde.
Umushaku gwawe, guhononosiri bwija,
nga lukuuli lweꞌmbene, íziri mu lindimuka ku migazi yeꞌGiryadi.
2 Amiino gaawe, gali mu ba nga bibuzi íbyakemwa,
binabe biri mu yogoroka ukushukwa mu miiji.
Ngiisi kiguma kiri niꞌhasha lyakyo,
ndaanakyo íkikafwisa.
3 Imishushu yawe, iri nga kitambala kidukula.
Akanwa kaawe, kanasimisiizi bweneene.
Mu lushungi lwawe, amatama gaawe gali mu boneka
nga bihande bibiri byaꞌmakomamanga.
4 Igosi lyawe, litigalisirwi nga lwingo lwa Dahudi.
Ee! Lukaziriringwa mu kuyubakwa.
Yulwo lwingo, lumanisirwi mweꞌsiribo kihumbi.
Na zooshi, ziri siribo zeꞌndwani.
5 Amabeere gaawe gombi, gali nga tusa twiꞌhasha.
Yutwo tusa, tugweti tugaragira mu kati keꞌyungiyungi.
6 Ikyanya bútazi tejuukana, neꞌbimbehwa bítazi nyerera,
ngakwabadukira ku mugazi gwoꞌmubadu, naꞌmalaasi.
7 E mukundwa wani, unonosiri ngana-ngana.
Ndaanako kashembo ko uhiiti.
8 «E shasha yani, yijaga tushaage i Lebanooni.
Manukaga kwiꞌrango lyoꞌmugazi Hamana,
na lyo gweꞌSeniiri na gweꞌHerimooni.
Haaho, ho hali imyobo yeꞌndare.
Hanali heꞌngwi ziri mu genda.
9 E shasha yani, ikyanya uli mu nyinamulira amasu,
umutima gwani, guli mu yami lyamuza.
Uli weꞌmwani! Unakoli mba mu mutima.
Ikyanya uli mu goola igosi íriri kwoꞌmugufu,
umutima gwani guli mu yami hola ngana-ngana!
10 E shasha yani, uli weꞌmwani.
Urukundo lwawe luli mu ndwala kasinge-singe,
lunali lwo lwija ukuhima idivaayi.
Amalaasi gaawe, gali mu huumura bweneene,
ukuhima umuhongolo gweꞌbilungo byoshi.
11 E shasha yani, ikyanya tugweti tuganyunyugutana,
imishushu yawe, iri mu nuna ngana, ngoꞌbuuki.
Ululimi lwawe, luli mu huluka mwaꞌmata noꞌbuuki.
Ewe! Ibyambalwa byawe, bigweti bigahuumura ngeꞌbiti byeꞌLebanooni.
12 E shasha yani, uli weꞌmwani.
Uli nga ndalo yani ya nienyene.
Unali we shyoko yani, unali kirigo kyani íkibishamiri.
13 Ishibwe zaawe, iri ndalo yaꞌmakomamanga.
Ibitumbwe byayo, binuniriiri bweneene ukuhima amalaasi geꞌhina na geꞌnarido.
14 Bihimiri kiri neꞌnarido nvushe mweꞌzafarani,
noꞌmushaayi-shaayi kuguma noꞌmudalasini, neꞌzindi mbuto íziri noꞌmuhongolo mwija.
15 Wehe, ulyagagi ishyoko ya mu ndalo,
unali kirigo kyaꞌmiiji íkitali mu kama.
Uli nga nyiiji íziri mu shalala ukushaaga mu migazi yeꞌLebanooni.»
Umunyere
16 «E mbuusi yeꞌmbembe, uhuusagye!
Na naawe, e mbuusi yeꞌkisaka!
Uyiji huusa hiꞌgulu lyeꞌndalo yani.
Muhuumure kwiꞌgulu ngaꞌmalaasi.
Na naawe e mukundwa wani! Uyingirage mu ndalo yawe,
unalye ku bitumbwe byamwo, kwo biri binunu-binunu.»