5
Umushosi
1 «E shasha yani, uli weꞌmwani.
Keera nayingira mu ndalo yani.
Ngweti ngayimbula imanemane,
kuguma noꞌbwasi úbuli mu huumura.
Na ngweti ngamiima ibibambala byoꞌbuuki,
na nywe idivaayi, kuguma naꞌmata.»
Abanyere beꞌYerusaleemu
«E biira baani, mugire mulye.
Ee! Mukizi nywa, halinde mulaluke urukundo.»
Ayiji yigula makeereza
Umunyere
2 «Kundu nâli huniiri, si umutima gwani gwâli ki laliiri,
nanayuvwa ikindu kyalasa.
Kiziga, umukundwa wani ye gweti úgayiguza.
Anambwira kwokuno: “E mukundwa wani, unali ngunde yani!
Ulyagagi weꞌmwani.”»
Umushosi
«Aaho! E mwali wani mukundwa, unyigulire maashi! Wehe uli ngunde yani, ndaako kashembo ko uhiiti.
Itwe lyani liyijwiri ikimi.
Noꞌmushaku gwani, gwaloba noꞌbutonyanga bwa mu bushigi.»
Umunyere
3 «Si keera nahogola ibyambalwa byani.
Aahago! Ka nangashubi biyambala? Nanga, maashi!
Keera nayusa ukuyikaraba amagulu gaani,
ndanaki loziizi ukushubi gayulubaza.
4 Lyeryo, ikyanya umukundwa wani akagiraga mbu ayiguze,
umutima gwani gwanashambaala ngana-ngana!
5 Nanayami guruka, kwo ngendi múyigulira.
Ikyanya nꞌgagwata ikigaliro kyoꞌlwivi, mbu nimúyigulire,
amaboko gaani gâli kizi nyekemba neꞌmanemane.
6 Ikyanya nꞌgamúyigulira, atâli ki riiri ho!
Nanamúshakula-shakula, shoobe!
Na kundu nâli kizi múhamagala, haliko, atananyakula.
Umutima gwani gutanaki yika mu nda.
7 «Abalaliizi baꞌkaaya, ikyanya bâli gweti bagazunguluka ku luzitiro,
banayiji ngwana mu njira.
Banatee mmota, banangomeeresa,
banabuli nyugutula ulushungi kwiꞌtwe lyani.
8 «E banyere beꞌYerusaleemu! Namùyinginga mwe bakongwa!
Ulya mukundwa wani, iri mwangamúbonaga,
mumúbwire kwo nimúkuuziri bweneene,
kyo kinatumiri ndi mu lyanirwa kwoku.»
Abanyere beꞌYerusaleemu
9 «Si we nonosiri ngana-ngana, ukuhima abandi banyere!
Aahago! Uyo mukundwa wawe, biki byo agweti ukuhima abandi bakundwa?
Ee! Biki byo abahimiri kwo,
halinde wangatuyinginga mwene yuku?»
Umunyere
10 «E balya, ulya mukundwa wani, anonosiri ngana, analakusiri.
Kundu mwanganyereka abashosi bihumbi ikumi,
haliko yehe, ye bahimiri booshi.
11 Itwe lyage libuyahiri nga nooro muguuhya.
Ibishungi byoꞌmushaku gwage, biri mu lembeera.
Yugwo mushaku guli mwiru ziriri, nga namujongo.
12 Amasu gaage gali nga geꞌngunde ízikeyengiini ha lwiji.
Gali nga bunyezi-nyezi.
Imboni zaago, ziri nga bazivuruguuza mu mata.
13 Amatama gaage, gali nga ndalo mbyale mwoꞌbwasi úbuli mu huumura bweneene.
Imishushu yage, iri nga yungiyungi.
Ee! Iyo mishushu, iri mu toonya-toonya kwaꞌmanemane ku bwingi.
14 Amaboko gaage, gali nga mbete zeꞌnooro.
Yizo mbete, ziri ndimbiise naꞌmabuye geꞌkishingo.
Ikikaraza kyage, kiri nga musigooti úgukatulwa mu mahembe geꞌnjovu,
gunabe gulimbisiibwi kwaꞌmabuye geꞌsafiiri giꞌbara lya namukungumo.
15 Ibibero byage, biri nga nguliro zaꞌmabuye miiru ágalangashiini.
Yizo nguliro, zikashingwa mu ndaliro zeꞌnooro muguuhya.
Injusho yage, ali mu nooka-nooka nga mugazi Lebanooni.
Ee! Iri nyiija ngana, nga biti byeꞌmyerezi.
16 Akanwa kaage, kanuniri bweneene.
Asimisiizi ngana ku njira zooshi.
E banyere beꞌYerusaleemu! Yolya, ye mukundwa wani,
anali ye mwira wani!»