8
Umunyere
1 «Aahago! Njubi siimiri kwo ube mushija wani,
ye tukayonga ibeere liguma!
Kwokwo, iri nangakusaka imbuga,
nangayami kunyunyuguta, ndaanaye woꞌkungyokola.
2 Njuba ngakuhisa mu nyumba ya maawe.
Byoshi byo nyiji, ye kabinyigiriza.
Keera nakanda umutobo gweꞌdivaayi mu makomamanga gaani.
Njuba ngakunywesa gwo.
3 «Ukuboko kwage kweꞌlumosho, kushiziri itwe lyani.
Noꞌkuboko kwage kweꞌlulyo, kwo kunvumbatiiri.
4 «E banyere beꞌYerusaleemu, namùyinginga, maashi!
Mutakolwe mbu muyivyule mwoꞌlulungumizi,
neꞌkihe kyalwo kitazi hika!»
Urukundo luli neꞌmisi nga Narufu
Abanyere beꞌYerusaleemu
5 «Nyandagi uyu úgweti úgazamuuka, mu kushaaga mwiꞌshamba,
anashendamiiri ku mukundwa wage?»
Umunyere
«Nꞌgakuvyulira ululungumizi mwiꞌdako lyeꞌkiti kiꞌpera,
halya ho nyoko akayuvwirwa umukero, anakubuta.
6 Umbiike mu mutima gwawe nga kamangu.
Ee! Mbe nga kamangu ku maboko gaawe.
Mukuba, urukundo luli noꞌbushobozi ngoꞌbwa Narufu.
Uluugi lwalwo, luyamiri ho nga shinda.
Ewe! Lugweti lugayami yaka nga muliro.
Lunali mu singoola nga mbigi zaagwo.
7 Urukundo mwene yulwo, amiiji mingi gatangaluzimya.
Inyiiji zitangahasha ukuluzisa.
Kundu umundu angagira mbu alutangage kweꞌbindu byage byoshi,
angaba agweti agagayirizibwa naaho.»
Bashija boꞌmukazi
8 «Tugweti mwali witu mwanuke, útazi fundika amabeere.
Aahago! Ulusiku agafundikwa, tugamúgirira biki?
9 Iri angaba akiri munyere, kuli kudetaga kwo ali nga kibambaazi,
tugamúzungulusa ulwingo lweꞌharija, mu kumúkingira.
Haliko, iri angaba akola mushule, nga lwivi luyanuule, e maashi!
Tugaluhamika mu kulukomerera kwoꞌlupahwa lweꞌkiti kyoꞌmwerezi.»
Umunyere
10 «Niehe, nâli riiri kibambaazi,
naꞌmabeere gaani, gali lwingo lukomu.
Ku yukwo, ikyanya umukundwa wani ali mu mbona,
ananziime bweneene.
11 Mwami Sulumaani âli gweti indalo yeꞌmizabibu, i Baali-Hamooni.
Iyo ndalo, anagitiiza abahiizi, gira bakizi gikoleesa.
Ngiisi muguma wabo, anakizi tanga ibingorongoro kihumbi.
12 Haliko niehe, indalo yani yeꞌmizabibu, iri yeꞌmwani nienyene, nganagikoleesa ngiisi kwo ndoziizi.
Kwokwo, Sulumaani angabeerana neꞌbingorongoro byage kihumbi byeꞌharija.
Haliko, ngiisi mulaazi, ngamúheereza ibingorongoro magana gabiri, gira akizi yiji gitanduula.»
Umushosi
13 «E mukundwa wani, we tuuziri mu ndalo!
Abiira baani bakolaga bahiirwa, bwo bagweti bagayuvwa izu lyawe.
Aahago! Na naani, ndongage ukukizi liyuvwa!»
Umunyere
14 «E mukundwa wani, uvwaruke,
gira tugendanwe ku migazi áhali birya bikere íbiri mu huumura bwija.
Tutibitire yo, nga kasa, kandi iri nga nzobe.»