2
Imbira yoꞌkugalukira Nahano
1 Aahago! Si mutaki yuvwiti ishoni!
Mukuumane kuguma! Mukuumane kuguma!
2 Buzira kwokwo, mugayehuulirwa hala nga byula.
Mugire mukuumane, ku kyanya uburaakari bwa Nahano butazi mùhikira.
Mukuba, ukumùhana, agamùhana ku buraakari bwage!
3 Mweshi mwe mukiri mu yibiika haashi, mukizi looza Nahano,
munabe musimbahiiri imaaja zaage.
Mulooze ukukizi gira íbikwaniini, iri munayibiika haashi imbere lyage.
Kwokwo, ku yulwo lusiku lwoꞌburaakari bwage, hali ikyanya mwangafuushuka.
Abafirisiti bagaahanwa
4 Akaaya keꞌGaza, naꞌkeꞌHashikelooni, twombi tugaasigwa mushaka.
Abatuulaga beꞌHashidoodi bagayimulwa kalenge-renge, naꞌbeꞌHekurooni, nabo bagayami hongolwa.
5 E Bafirisiti, mwe mutuuziri ku butambi bweꞌnyaaja, na mu kaaya keꞌKaanani!
Na niinyu kwakundi, mukolaga mugaahanwa.
Ee! Nahano akola agamùminika,
hataganasigala kiri na woꞌmuti!
6 E Bafirisiti! Yaho ku ngombe yeꞌnyaaja, hagahinduka ndagiriro yeꞌbibuzi.
Abangere bagakizi gisha ho, neꞌbitugwa byabo.
7 Abayuda ábasigiiri, nabo bagakizi hashumbika.
Ee! Bagakizi ragirira heꞌbitugwa byabo.
Bushigi, bagakizi gwejera mu nyumba ízikasigwa mu kaaya keꞌHashikelooni.
Mukuba, Rurema Nahamwabo, agabatanduula, anakizi bagenduusa,
halinde banashubi tuula bwija nga kwo bâli tuuziri ubwa mbere.
8 «E bandu baani, ikyanya Abamohabu bâli kizi mùhonyoleza, nâli yuvwiti.
Nꞌganayuvwa neꞌkyanya Abahamooni bâli kizi mùtuka.
Bâli gweti bagakizi gayiriza abandu baani,
iri banayiji bagaaza ikihugo kyabo.»
9 Nahano woꞌbushobozi bwoshi, Rurema waꞌBahisiraheeri adetaga kwokuno:
«Nga kwo nyamiri ho, balya Bamohabu, naꞌBahamooni, ngabashereeza lwoshi.
Ee! Ngabashereeza ngana, nga kwo nꞌgashereeza abandu beꞌSoodoma naꞌbeꞌGomora.
Ikihugo kyabo, kigahinduka ishamba lyeꞌmishuugi, neꞌbinogo byoꞌmuloba,
kinasigale mushaka, halinde imyaka neꞌmyakuula.
Abandu baani ábagaaba basigiiri, bagagendi shahula ngiisi byo baloziizi,
banayiji yabiira kiri neꞌkihugo kyabo.»
10 Yabo Bamohabu, naꞌBahamooni, si bâli kizi yikangaata.
Kyanatuma bagaahanwa nga kwo byâli bakwaniini.
Bâli kizi shekeereza abandu ba Nahano woꞌbushobozi bwoshi.
11 Kwokwo, agababiika mweꞌkyoba bweneene,
anashereeze imizimu yoshi mu kihugo kyabo.
Abandu baꞌmahanga gooshi bagakizi yikumba Nahano,
ngiisi bandu mu kihugo kyabo.
12 Nahano adetaga kwokuno: «Mwe bandu beꞌHendyopiya, niinyu ngamùyita ku ngooti.
13 Ngashereeza kiri neꞌkihugo kyeꞌHasuriya, uluhande lweꞌmbembe.
Akaaya kaakyo kahamu keꞌNinaawi, ngakahindula kabe mushaka,
kanasigale kayumiri lwoshi ngiꞌshamba.
14 Yako kaaya, kundu kâli gweti kagakizi yikangaata,
haliko ibitugwa byo bigasigala mwo, kuguma neꞌnyamiishwa.
Banyunda, neꞌnyange-nyange, noꞌtubangarara bigatuula ku nguliro zaako.
Banafufulu bagakizi lakira ku twazo twako,
kiri na banamujongo bagakizi lakira ku bihamambiro byeꞌmiryango yako.
Neꞌbiti byeꞌmyerezi, bigasigala bwalaafwe kwiꞌzuuba.»
15 Yako kaaya keꞌNinaawi, abandu bâli katuuziri mwo ku malega, na mu butoge.
Bâli kizi deta, ti: «E balya, si twe tushubi sumbiri abandi bandu booshi!»
Aaho! Kuti kuno ukolaga mushaka
unakoli ba igomberano lyeꞌnyamiishwa!
Ikyanya abandu bagakizi lenga yaho, bagakizi kuhonyoleza,
iri banashagania amaboko, mu kukushekeereza.